Erson Zymberi përfundon mandatin si drejtor i Teatrit të Gjilanit: “Për mu, ka me mbetë përgjithmonë shtëpia ime”
Erson Zymberi ka njoftuar se sot ka përfunduar mandatin e tij të dytë si drejtor i Teatrit të Gjilanit, duke e përmbyllur kështu angazhimin e tij në drejtimin e këtij institucioni kulturor.
Në mesazhin e tij, Zymberi ka falënderuar aktorët, kolegët, bashkëpunëtorët artistikë, stafin teknik e administrativ, partnerët dhe publikun për bashkëpunimin dhe mbështetjen gjatë këtyre viteve.
Ai ka thënë se kjo periudhë ia ka forcuar bindjen se një teatër ndërtohet përmes besimit, bashkëpunimit dhe hapësirës për ide e njerëz.
Pas përfundimit të mandatit në Teatrin e Gjilanit, Zymberi do ta vazhdojë angazhimin profesional në Fakultetin e Arteve të Universitetit të Prishtinës, si profesor i Regjisë së Teatrit.
“Teatrit të Gjilanit i uroj punë të mbarë, guxim artistik dhe një publik që e përcjell me besim e kërkesa. Për mu, ai ka me mbetë përgjithmonë shtëpia ime”, ka shkruar Zymberi.
Ai ka shtuar se Teatri ka qenë aty para tyre dhe do të vazhdojë të jetë edhe pas tyre, ndërsa veten e konsideron me fat që pati mundësinë t’i shërbejë për një periudhë.
