Driton Kuka nderohet me çmimin më të lartë të Akademisë Sportive të Malit të Zi
Trajneri i njohur i Kosovës në xhudo, Driton Kuka, është vlerësuar me çmimin kryesor të Akademisë Sportive të Malit të Zi. Lajmi është bërë i ditur të martën nga vetë ky institucion shkencor-sportiv.
Kuka është nderuar për arritjet e jashtëzakonshme në xhudo, veçanërisht për sukseset e shumta në Lojërat Olimpike, Kampionatet Botërore, Kampionatet Evropiane dhe në gara të tjera ndërkombëtare.
Në kuadër të Konferencës së 24-t Ndërkombëtare të mbajtur në Budva, Akademia Sportive e Malit të Zi i ndau çmimin prestigjioz “Golden Plaque – Montenegrin Sports Academy Awards” kryemjeshtrit kosovar.
Ky vlerësim i është dhënë për rezultatet e larta në arenën ndërkombëtare, kontributin në promovimin e sportit dhe për përsosmëri në karrierën e tij si trajner.
Kujtojmë se këtë çmim, vitin e kaluar, e kishte fituar përzgjedhësi i Kroacisë në futboll, Zlatko Daliq.
Akademia e Malit të Zi e ka prezantuar Kukën si një ndër trajnerët më të mirë të xhudos në botë, duke theksuar se ai ka ndërtuar një nga sistemet më të suksesshme të këtij sporti në Evropë.
Për shkak të angazhimeve të tij në Kampionatin Evropian gjatë kohës së konferencës, Kuka nuk ishte i pranishëm në ceremoni, ndërsa çmimi pritet t’i dorëzohet në konferencën e radhës që do të mbahet në Podgoricë.
Akademia Sportive e Malit të Zi është një institucion i dedikuar avancimit të shkencës sportive, duke bashkuar studiues dhe profesionistë me synimin për zhvillimin e këtij sektori.
Driton Kuka ka fituar një sërë çmimesh individuale gjatë karrierës së tij, falë sukseseve të arritura me xhudistët që ai ka trajnuar. Ai gëzon respekt të madh në Federatën Ndërkombëtare të Xhudos dhe në Unionin Evropian të Xhudos, ku mban edhe role të rëndësishme.
Nën drejtimin e tij, sportistët kosovarë kanë fituar pesë medalje olimpike, tri prej tyre të arta. Prej më shumë se një dekade e gjysmë, Kuka vazhdon të prodhojë rezultate të mëdha në skenën ndërkombëtare.
