DKA Gjilan: Drejtori Jeton Rexhepi takon Këshillin e Prindërve: Siguria dhe cilësia në shkolla mbeten prioritet i përbashkët
Diskutohen bashkëpunimi, disiplina dhe sfidat në arsimin parauniversitar në Gjilan – shkruan TV Gjilani.
Drejtori i Drejtorisë Komunale të Arsimit në Gjilan, Jeton Rexhepi, së bashku me kryetarin e Këshillit të Prindërve të Komunës së Gjilanit, Faton Dubova, kanë pritur në takim përfaqësues të Këshillit të Prindërve dhe disa anëtarë të kryesisë.
Sipas drejtorit Rexhepi, gjatë këtij takimi është biseduar për rëndësinë e bashkëpunimit ndërmjet këshillave të prindërve nëpër shkolla dhe institucioneve edukativo-arsimore në të gjitha nivelet e arsimit parauniversitar.
Ai bëri të ditur se në takim janë trajtuar edhe disa çështje dhe shqetësime të ngritura nga përfaqësuesit e prindërve, ndër to mosfunksionimi i disa këshillave të prindërve në shkolla të caktuara, mungesa e uniformave për nxënësit si dhe mungesat e nxënësve, veçanërisht në shkollat e mesme të larta.
Rexhepi theksoi se gjatë diskutimit palët janë pajtuar që siguria, disiplina dhe cilësia në shkolla të mbeten synime të përbashkëta, të cilat kërkojnë angazhim të koordinuar nga institucionet dhe shoqëria.
Ai shtoi se Drejtoria e Arsimit do të vazhdojë të jetë e përkushtuar për arritjen e këtyre objektivave dhe për forcimin e bashkëpunimit me prindërit dhe komunitetin.
