Delegacioni i PH Zug vizitoi shkollat fillore në Gjilan ku u njohën me praktikat mësimore
Një delegacion nga Pädagogische Hochschule Zug (PH Zug) në Zvicër, i udhëhequr nga Rektorja Prof. Dr. Esther Kamm, po qëndron këtë javë në Universitetin Publik “Kadri Zeka” në Gjilan.
Gjatë qëndrimit të tyre delegacioni vizitoi shkollat fillore “Thimi Mitko”, “Musa Zajmi”, “Selami Hallaqi” dhe “Rexhep Elmazi”, mësuesit e të cilave, si pjesë e bashkëpunimit që Universiteti Publik “Kadri Zeka” ka me PH Zug, janë dërguar për një vizitë studimore njëjavore në Zvicër. Delegacioni u prit nga drejtorët dhe mësimdhënësit e këtyre institucioneve.
Ata vizituan klasat e ku mbahej mësimi, ku delegacioni pati mundësinë të shikojë nga afër procesin mësimor me nxënësit, të njihen me metodat e përdorura nga mësimdhënësit dhe të vlerësojnë angazhimin e nxënësve në aktivitete praktike dhe interaktive. Ata gjithashtu vizituan hapësirat e shkollave, duke parë bibliotekat, laboratorët dhe ambientet e tjera mësimore.
Drejtorët e shkollave pritëse shprehën kënaqësinë për vizitën e delegacionit nga PH Zug. Ata thanë se ky bashkëpunim na jep mundësi të shkëmbejmë eksperienca dhe të përmirësojmë vazhdimisht metodat e mësimdhënies.
Nga ana e saj, Rektorja Prof. Dr. Esther Kamm theksoi se kjo vizitë është një eksperiencë shumë e vlefshme të shohim se si shkollat e Gjilanit përgatisin nxënësit për sfidat e së ardhmes. Ajo tha se , bashkëpunimi shkollë–fakultet është një model që mund të shërbejë si shembull i shkëmbimit të praktikave të mira ndërkombëtare.
Anëtarët e tjerë të delegacionit u shprehën se vizita i ndihmon ata të kuptojnë më mirë realitetin dhe nevojat e arsimit fillor në Kosovë, duke nxitur ide për projekte të përbashkëta dhe mënyra inovative të mësimdhënies.
