Ceremonia e pranimit të 675 shtretërve spitalor nga Agjencia Japoneze për Bashkëpunim Ndërkombëtar (JICA).
Ministri i Shëndetësisë Dr. Rifat Latifi me bashkëpunëtorë mori sot pjesë në QKUK në ceremoninë e pranimit të 675 shtretërve spitalor nga Agjencia Japoneze për Bashkëpunim Ndërkombëtar (JICA), në në kuadër të Projektit për Zhvillimin e Kapaciteteve Kundër Sëmundjeve Infektive, përfshirë COVID-19.“Pas asistencës teknike të ofruar ndër vite, trajnimit të menaxherëve shëndetësor në Japoni, dhurimit të terapisë Favipiravir për trajtimin e pacientëve me COVID-19 në fillim të pandemisë, pajisjeve spitalore, ndihmës në fushatën për vaksinim; spitalet tona po pranojnë një mbështetje të jashtëzakonshme, kësaj radhe, 675 shtretër spitalor”, tha Ministri Latifi gjatë kësaj ceremonie.
Qeveria e Kosovës dhe Ministria e Shëndetësisë, tha ai, është shumë falënderuese për këtë përkrahje, sikurse edhe vet qytetarët e Kosovës, të cilët tek Qeveria dhe populli japonez, kanë gjetur gjithmonë mbështetje për kërkesa konkrete.
“Kontributet si ky, do ta kenë ndikimin e drejtpërdrejt në cilësinë e shërbimeve dhe kujdesit shëndetësor dhe ne ju falënderojmë edhe një herë për mbështetjen konkrete dhe të vazhdueshme për shëndetësinë tonë”, u shpreh Ministri Latifi. I ngarkuari me punë i Ambasadës së Japonisë në Kosovë, z. Yamanaka Keisuke, tha se sigurimi i shtretërve për QKUK është pjesa e dytë e implementimit të projektit që kap vlerën prej 846. 000 eurove apo 110 milionë Yenëve Japonez.
Përfaqësues Kryesor i Zyrës Ballkanike të Agjencionit Japonez për Bashkëpunim Ndërkombëtar (JICA), z, Jiro Takeichi, tha se bazuar në marrëveshjen me MSh-në/SHSKUK-në, 359 shtretër do të mbesin në QKUK, ndërsa 316 të tjerët do të jenë për gjashtë spitalet e përgjithshme (Prizren, Gjilan, Ferizaj, Gjakovë, Pejë dhe Mitrovicë).Ai tha se përfituesit kryesor nga modernizimi i shtretërve spitalor, vebinaret e përcjella lidhur me sëmundjet ngjitëse, përfshirë COVID-19 dhe hulumtimit rreth sektorit shëndetësoor do të jenë qytetarët e Kosovës.
