Bujanoc: Mbahet aktiviteti përmbyllës i projektit “Qyteti Ynë, shkollat tona”
Sot u zhvillua aktiviteti përmbyllës i projektit nëntë vjeçar “Qyteti Ynë, Shkollat Tona”, i cili kishte për qëllim përmirësimin e bashkëpunimit ndër institucional dhe forcimin e cilësisë së arsimit në komunat Preshevë, Bujanoc dhe Medvegjë.
Projekti u realizua në partneritet mes:
▪︎ Trupit Koordinues të Qeverisë së Serbisë për Preshevë, Bujanoc dhe Medvegjë
▪︎ Grupit 484
▪︎ Fondacionit “Pestalozzi Children’s Foundation”
▪︎ Ministrisë së Arsimit
Gjatë viteve të zbatimit, në kuadër të këtij projekti u realizuan shumë aktivitete të rëndësishme edukative, motivuese dhe bashkëpunuese.
Ndër to përfshihen orë të përbashkëta mësimore, punëtori të shumta, si dhe vizita edukative të nxënësve në vende të ndryshme të Evropës.
“Për këto aktivitete, përveç profesorëve të tjerë, falënderojmë në veçanti profesoreshën e shkollës sonë Jelena Randjelović, e cila ka dhënë një kontribut të çmuar në organizimin dhe realizimin e tyre”, shkruan faqja zyrtare e shkolles.
“Shkolla jonë u përfaqësua me profesionalizëm nga psikologia Arta Maksuti, koordinatorja e projektit, e cila ka kontribuar në mënyrë të jashtëzakonshme gjatë gjithë procesit”, shkruan poashtu faqja e shkolles.
“Në përmbyllje, shkolla jonë u nderua me një mirënjohje për bashkëpunimin dhe angazhimin shumëvjeçar. Falënderojmë të gjithë partnerët, mësimdhënësit dhe nxënësit për kontributin e tyre të vazhdueshëm”, perfundon njoftimi nga shërbimi i shkollës!
