Bordi Këshillëdhënës Industrial në Universitetin Publik “Kadri Zeka” ka zgjedhur kryetarin e ri
UKZ në Gjilan ka mbajtur takim më përfaqësues të tregut të punës nga sektori privat dhe publik si dhe përfaqësues nga fushëveprimtaria e Universitetit, me përfaqësues të drejtorive të arsimit nga rajoni i Anamoravës, respektivisht nga Komuna e Gjilanit, Kamenicës dhe e Vitisë.
Qëllimi i këtij takimi ishte zgjedhja e mandatit vijues të Bordit Këshillëdhënës (Industrial) të Universitetit Publik “Kadri Zeka”.
Vet përfaqësuesit e Institucioneve komunale, kompanive dhe bizneseve, kanë zgjedhur kryetarin e Bordit Këshillëdhënës (Industrial) për mandatin vijues 2023-2028, avokatin Arsim Vranovci.
Rektori I UKZ-se, Prof. Asoc. Dr. Artan Dërmaku, tha se përmes Bordit Këshillëdhënës Industrial (BKI) UKZ-së po synon ta ndërlidhë sa më shumë universitetin dhe anën akademike me bashkësinë dhe tregun e punës.
“Një nga objektivat më të rëndësishme për Bordin Këshillëdhënës Industrial(BKI) është të kontribuojë në suksesin strategjik të Universitetit Publik “Kadri Zeka” në Gjilan dhe të programeve studimore të fakulteteve të tij”, tha Rektori Dërmaku.
Në fjalën e tij kryetari i deritanishëm i Bordit Industrial Këshillëdhënës Xhelal Selimi, tha se i gjithë sektori publik dhe privat duhet të punojnë ngushtë në mënyrë që të përkrahin Universitetin Publik “Kadri Zeka”.
Drejtori i drejtorisë komunale të Arsimit në Kamenicë Afrim Dervishi në fjalën e tij tha se të gjithë këtu që jemi të pranishëm, jemi shpresë për njëri-tjetrin, andaj siç tha drejtori UKZ ka nevojë për ta ndihmuar në zhvillim.
Nexhat Hajrullahu nga drejtoria komunale e Arsimit në Gjilan, tha se gjendja në arsim fillor dhe të mesëm është e vështirë, sepse çdo ditë ka rënie të numrit të nxënësve. Ai tha se pajtohet me idenë që universiteti duhet të ketë ndërlidhje të programeve studimore më drejtimet e shkollë së mesme, si shembull mori themelimin e programeve që kanë të bëjnë me industrinë e bujqësisë dhe ushqimit.
Afaristet, Mon Qoqaj nga industria Qoqaj dhe Arta Haziri Nuhiu menaxhere në Vali Rahch, thanë se Gjilanit me të vërtet i duhen programe të teknologjisë ushqimore dhe të gastronomisë, sepse sipas tyre vazhdimisht vërehet mungesa e stafit profesional në këto lëmi.
Ndërsa Arsim Vranovci tashmë kryetar i Bordit Këshillëdhënës Industrial në Universitetin Publik “Kadri Zeka” në Gjilan, pasi falënderoi të gjithë për besimin e dhënë, tha se do të mundohet të punojë në të mirë të universitetit
Rektori Prof. Asoc. Dr. Artan Dërmaku uroi Arsim Vranovcin për zgjedhjen kryetar të BKI, derisa ka ftuar të gjithë që të japin ide konkrete për zhvillimin e programeve bashkëkohore që është synim i yni i përbashkët.
