Arbër Ismajli, nënkryetar i LDK-së Gjilan: “LDK-ja është më e madhe se secili prej nesh”
Gjilan, 18 qershor 2026 – Nënkryetari i Degës së LDK-së në Gjilan, Arbër Ismajli, ka reaguar përmes një statusi publik lidhur me zgjedhjet nacionale të 7 qershorit në Kosovë dhe zhvillimet e fundit brenda Lidhjes Demokratike të Kosovës.
Në mesazhin e tij, Ismajli thekson se përfundimi i procesit zgjedhor duhet të shërbejë si moment reflektimi.
“Përfundimi i këtij procesi zgjedhor duhet të jetë një moment reflektimi për secilin prej nesh. Zgjedhjet kalojnë, rezultatet mbeten, por mbi të gjitha mbetet përgjegjësia që kemi ndaj LDK-së dhe ndaj njerëzve që na besojnë”, shkruan ai.
Sipas Ismajlit, LDK-së sot i duhen “ekipe të sinqerta, njerëz që e vendosin interesin e partisë mbi interesin personal dhe që punojnë për suksesin e përbashkët, jo për llogari individuale”, duke shtuar se “partia nuk forcohet me ambicie personale, por me përkushtim, besnikëri dhe gatishmëri për të kontribuar në çdo kohë, pavarësisht pozitës apo rezultatit”.
Ai vlerëson lart kontributin e aktivistëve që “kanë dhënë gjithçka nga vetja për LDK-në, pa kërkuar asgjë në këmbim”, duke i cilësuar si “forca jonë më e madhe dhe arsyeja pse LDK vazhdon të ecë përpara”.
Megjithatë, nënkryetari i Degës së Gjilanit nuk kursen kritikat për ata që “zgjodhën të qëndrojnë në skuta, larg angazhimit dhe larg përgjegjësisë, duke pritur në heshtje se si do të përfundonte procesi për të dalë më pas me komente, kritika apo leksione”.
“LDK-ja nuk është ndërtuar dhe nuk ka rrugëtuar kurrë nga ata që presin momente të gatshme, por nga ata që janë në terren, që përballen me sfidat dhe që japin kontribut kur është më e nevojshme, jo vetëm kur është më e lehtë”, thekson Ismajli.
Në fund të reagimit, ai bën thirrje për tejkalim të ndasive:
“Tani është koha të lëmë anash pakënaqësitë, grupimet dhe interesat personale. Na duhet më shumë unitet, më shumë respekt për njëri-tjetrin dhe më shumë punë për objektivat që na bashkojnë. LDK-ja është më e madhe se secili prej nesh. Detyra jonë është ta forcojmë atë çdo ditë, me sinqeritet, me përgjegjësi dhe me bindjen se vetëm të bashkuar mund të arrijmë suksesin që e meritojmë.”
