Gjilan: Arbër Ismajli, uron kreun e KBI-së në Gjilan, Naim Aliu pas kthimit nga Haxhi
Në një postim në rrjete sociale, kandidati i degës së LDK-së për kryetar të Gjilanit, i cili njëherit ishte nënkryetar i kësaj komune në mandatin e kaluar, z. Arbër Ismajli ka njoftuar se gjatë ditës së sotme ka qenë në vizitë tek kreu i KBI-së në Gjilan, z. Naim Aliu, i cili sapo është kthyer nga Haxhi, shkruan TV Gjilani.
Ai ka shprehur kënaqëinë e tij për imamin Aliu, duke potencuar se e ka uruar për aktin më të lartë të devotshmërisë në Islam, kryerjen e Haxhit.
“Sot, patëm kënaqësinë që, bashkë me disa prej bashkëpunëtorëve të mi, të vizitojmë Këshillin e Bashkësisë Islame në Gjilan dhe kryetarin e saj, Naim ef. Aliun. Me zemër i uruam për kryerjen e Haxhit dhe për kthimin e tij të sigurt nga tokat e shenjta. Njëherit, shprehëm urimet më të përzemërta për të gjithë haxhilerët tanë që janë kthyer të bekuar nga ky udhëtim i shenjtë”, ka shkruar z. Arbër Ismajli.
Sipas tij, Haxhi mbetet një nga kulmet shpirtërore të çdo besimtari me bekim dhe nder që Zoti ua dhuron të përzgjedhurve.
“Takimi ishte i ngrohtë, vëllazëror dhe me një atmosferë të mbushur me ndjenjë besimi e respekti të ndërsjelltë”, shtoi ai, duke e falënderuar Ef. Naim Aliu, për mikpritjen e sinqertë!
“Lusim Zotin që të na bashkojë gjithmonë në paqe, mirësi dhe solidaritet!”, ka përfunduar Ismajli dedikimin e tij për kreun e KBI-së në Gjilan, Naim Aliu.
