DREJTORIA E SHËNDETËSISË NË GJILAN FINALIZON HAPËSIRAT PËR PENSIONISTËT

Drejtoria e Shëndetësisë në Komunën e Gjilanit ka përfunduar renovimin e zyrave dhe inventarizimin e hapësirave të dedikuara për pensionistët.

Ky është një hap i rëndësishëm drejt funksionalizimit të tyre dhe realizimit të premtimit të kryetarit të Komunës, Alban Hyseni, për krijimin e kushteve më të mira për moshën e tretë.

Sipas njoftimit të Drejtorisë së Shëndetësisë, tashmë edhe Aktivi i Grave Pensioniste dhe të gjithë pensionistët e Gjilanit do të kenë hapësirat e tyre. Në to do të mund të kalojnë kohën e lirë, të organizojnë aktivitete dhe të ruajnë lidhjet shoqërore.

“Kujdesi për moshën e tretë nënkupton respekt për përvojën, dinjitetin dhe kontributin e tyre në shoqëri” – thuhet në komunikatën e Drejtorisë së Shëndetësisë.

Drejtoria bën të ditur se do të vazhdojë të angazhohet që pensionistët të kenë hapësira të përshtatshme dhe mundësi për një jetë aktive e dinjitoze.