GJILANI NË BASHKËPUNIM ME AMBASADËN E JAPONISË PËR PAJISJE TË REJA NË QKMF
GJILAN, 29 Shtator 2026 – Qendra Kryesore e Mjekësisë Familjare në Gjilan pritet të pajiset me pajisje të reja mjekësore me mbështetjen e Ambasadës së Japonisë.
Sot, në QKMF u prit në takim znj. Ikuko INOUE, Koordinatore e Grantit pranë Ambasadës së Japonisë. Lajmin e ka bërë të ditur Drejtoria e Shëndetësisë dhe Mirëqenies Sociale e Komunës së Gjilanit.
Qëllimi i takimit ishte diskutimi i mundësisë së mbështetjes dhe investimit në QKMF, përmes financimit të pajisjeve të nevojshme për përmirësimin e shërbimeve shëndetësore.
Në fokus të bisedimeve ishte pajisja e Departamentit të Radiologjisë me pajisje të reja radiologjike, si dhe sigurimi i disa defibrilatorve, me qëllim rritjen e kapaciteteve diagnostikuese dhe përmirësimin e ofrimit të shërbimeve emergjente për qytetarët.
Gjatë vizitës, përfaqësuesja e Ambasadës së Japonisë pa nga afër hapësirën e Departamentit të Radiologjisë, përfshirë edhe zonën e renovimit ku është planifikuar instalimi i pajisjeve të reja. Gjithashtu u diskutuan nevojat konkrete të QKMF-së.
Nga DSHMS theksojnë se takimi ishte një hap i rëndësishëm në drejtim të konkretizimit të mbështetjes së mundshme.
“Takimi ishte një hap i rëndësishëm në drejtim të konkretizimit të mbështetjes së mundshme nga Ambasada e Japonisë për QKMF-në e Gjilanit, me synim forcimin e infrastrukturës dhe pajisjeve shëndetësore dhe ofrimin e shërbimeve më cilësore për qytetarët”, thuhet në njoftim.
