Drita nxjerr barazim të vlefshëm ndaj Kauno Zalgirisit – kualifikimi do të vendoset në “Fadil Vokrri”
Drita ka marrë një rezultat të rëndësishëm në ndeshjen e parë të raundit kualifikues të Ligës së Kampionëve, duke barazuar 1-1 në udhëtim ndaj Kauno Zalgirisit, një rezultat që e mban plotësisht të hapur garën për kualifikim.
Skuadra e drejtuar nga Zekirija Ramadani tregoi karakter, reagoi në pjesën e dytë dhe arriti të shmangë humbjen falë golit të Blerim Krasniqit, duke u kthyer në Kosovë me një rezultat mjaft të favorshëm para sfidës së kthimit.
Takimi nisi me ritëm të lartë, ndërsa vendasit kaluan në epërsi në minutën e 24-t. Pas një goditjeje nga këndi, topi u devijua në zonë nga Rokas Lekiatas, ndërsa Amine Benchaib u gjend në vendin e duhur për ta dërguar topin në rrjetë dhe për t’i dhënë epërsinë 1-0 skuadrës lituaneze.
Drita provoi të reagojë, por në pjesën e parë nuk arriti të krijojë raste të pastra shënimi, duke bërë që 45-minutëshi i parë të mbyllej me avantazhin minimal të Kauno Žalgirisit.
Në fraksionin e dytë, kampionët e Kosovës ndryshuan fytyrë, morën kontrollin e lojës dhe ushtruan presion të vazhdueshëm në kërkim të golit të barazimit.
Shpërblimi erdhi në minutën e 82-të. Pas një krosimi të saktë nga Raddy Ovouka, Blerim Krasniqi u shkëput më lart se mbrojtësit vendas dhe me një goditje të fuqishme me kokë e dërgoi topin në cepin e portës, duke vulosur rezultatin përfundimtar 1-1.
Ky barazim i jep Dritës një avantazh psikologjik dhe e lë gjithçka të hapur për ndeshjen e kthimit, e cila do të zhvillohet pas një jave në stadiumin “Fadil Vokrri” në Prishtinë. Me mbështetjen e tifozëve të saj, kampionia e Kosovës do të synojë fitoren që e dërgon në raundin e ardhshëm të kualifikimeve për Ligën e Kampionëve.
