Heroi nga Gjilani shpëton nga mbytja në Golem një 10-vjeçar me Sindromën Down
Një akt i jashtëzakonshëm trimërie është shënuar në bregdetin e Golemit, ku zjarrfikësi nga Gjilani, Kastriot Sefedini, ka shpëtuar nga mbytja një 10-vjeçar me Sindromën Down, duke parandaluar një tragjedi që mund të kishte lënë pasoja të rënda për një familje nga Istogu.
Ngjarja ndodhi gjatë orëve të pasdites, në një kohë kur deti ishte i trazuar dhe shumica e pushuesve kishin dalë nga uji për shkak të valëve të mëdha. Sefedini, i cili ndodhej në pushime me familjen e tij, vuri re në horizont një fëmijë që po luftonte me valët.
Pa hezituar asnjë çast, ai u hodh në det dhe notoi me shpejtësi drejt tij.
“E pashë se po fundosej. Me të gjitha forcat arrita ta kap në sekondat e fundit. Ishte gati pa ndjenja dhe nuk mund të fliste. Së bashku me vrojtuesin e plazhit arritëm ta nxjerrim në breg dhe t’i japim ndihmën e parë”, rrëfen Kastriot Sefedini.
Vetëm pasi fëmija u nxor në breg, zjarrfikësi mësoi se bëhej fjalë për Elionin, një djalosh 10-vjeçar nga Istogu me Sindromën Down. Falë reagimit të shpejtë, ai iu dorëzua familjarëve të tij në gjendje të mirë shëndetësore, duke u kthyer pranë tyre pas momenteve të tmerrit dhe panikut.
“Është një ndjenjë e papërshkrueshme kur e di se një fëmijë sot është gjallë dhe pranë familjes së tij. I uroj Elionit shëndet dhe një jetë të lumtur”, u shpreh Sefedini.
Ky veprim heroik është vlerësuar gjerësisht nga qytetarët dhe pushuesit e pranishëm, të cilët e konsiderojnë Kastriot Sefedinin një shembull të humanizmit dhe përkushtimit, duke kërkuar që ai të nderohet edhe zyrtarisht nga institucionet për këtë akt të guximshëm.
Zjarrfikësi gjilanas dëshmoi edhe një herë se misioni për të shpëtuar jetë nuk njeh orar, uniformë apo pushim. Heroizmi i tij bëri që një ditë që mund të përfundonte në tragjedi, të mbyllej me buzëqeshjen dhe jetën e shpëtuar të një fëmije.
