Homazhe në nder të 18 Qershorit – Ditës së Çlirimit të Kamenicës
Në kuadër të shënimit të 18 Qershorit – Ditës së Çlirimit të Kamenicës, Kryetari i Komunës Kadri Rahimaj, së bashku me Nënkryetaren Arta Bajralija, Kryesuesen e Kuvendit Komunal Arbnore Beqiraj-Fera, Kryetarin e OVL-UÇK-së – dega në Kamenicë Milaim Limoni, drejtorë të drejtorive komunale, familjarë të dëshmorëve dhe qytetarë, bënë sot homazhe pranë varrezave të dëshmorëve.
Të pranishmit vendosën kurora me lule dhe nderuan me respekt të thellë veprën dhe sakrificën e dëshmorëve të kombit, të cilët dhanë jetën për lirinë e vendit.
Kryetari i Komunës, Kadri Rahimaj, theksoi se 18 Qershori mbetet një datë e shënuar në historinë e Kamenicës dhe një kujtesë e përhershme e sakrificës për liri.
“Sot jemi këtu për të nderuar ata që dhanë më të shtrenjtën për lirinë tonë. Dëshmorët e Kamenicës janë themeli mbi të cilin është ndërtuar liria dhe përgjegjësia jonë është që këtë sakrificë ta nderojmë çdo ditë me punë, përkushtim dhe zhvillim të komunës sonë. Liria që gëzojmë sot është amanet që na obligon të ecim përpara me unitet dhe përgjegjësi,” u shpreh Kryetari Rahimaj.
Pas përfundimit të homazheve, të pranishmit vizituan ekspozimin simbolik të armatimit të përdorur nga Ushtria Çlirimtare e Kosovës gjatë luftës në Zonën Operative të Karadakut. Përmes kësaj ekspozite u prezantuan mjete dhe pajisje që simbolizojnë rezistencën dhe përpjekjet për liri, duke nderuar kontributin e luftëtarëve dhe dëshmorëve të kësaj zone.
