Aston Villa shkruan histori, Emery rikthen lavdinë evropiane
Aston Villa është kurorëzuar kampione e Ligës së Evropës, pasi triumfoi me autoritet ndaj SC Freiburg në finale me rezultat të pastër 3-0, në një mbrëmje ku skuadra angleze dominoi nga fillimi deri në fund.
Ekipi i drejtuar nga Unai Emery tregoi superioritet të plotë në fushë, duke kontrolluar ritmin e lojës dhe duke mos i lënë hapësira kundërshtarit. Pas disa tentimeve të rrezikshme në fillim, Villa gjeti avantazhin pak para pushimit, kur Youri Tielemans finalizoi saktë një aksion të ndërtuar bukur nga Morgan Rogers
Vetëm pak minuta më vonë, anglezët goditën sërish. Emiliano Buendía realizoi një supergol me goditje elegante, duke e çuar rezultatin në 2-0 dhe duke e afruar trofeun drejt Birminghamit.
Në pjesën e dytë, Freiburg provoi të rikthehej në lojë, por Aston Villa mbeti e qetë dhe shumë e organizuar. Goli i tretë erdhi pas një tjetër aksioni të bukur ofensiv, ku Morgan Rogers vulosi triumfin me një finalizim të saktë për 3-0.
Ky sukses shënon një moment historik për klubin anglez, që rikthehet te një trofe evropian pas më shumë se katër dekadash. Ndërkohë, Emery vazhdon të konfirmohet si një specialist i kompeticioneve evropiane, duke shtuar edhe një tjetër trofe të madh në karrierën e tij të jashtëzakonshme.
