Reagon Konjufca: Kjo është luftë speciale – më prenë fjalën për të krijuar rrëfim të paqenë
Ish-kryetari i Kuvendit të Kosovës, reagon pas shpërndarjes së një fragmenti nga tubimi në Ferizaj dhe thotë se u përdor diskurs përçmues me termin “frizere”
Ish-kryetari i Kuvendit të Kosovës, Glauk Konjufca, ka reaguar ashpër ndaj mënyrës si u raportua një episod nga një tubim në Ferizaj, duke e cilësuar atë si “luftë speciale” për kontaminimin e skenës politike.
Sipas tij, një fragment i shkëputur me termin “frizere” u përdor jashtë kontekstit për të ndërtuar një narrativë të paqenë.
“Unë rrallë reagoj për lajme të rreme, sepse sot kjo të imponon të reagosh pothuajse çdo orë. Por kjo luftë speciale e sontme nuk më la indiferent”, shkroi Konjufca në një postim publik.
Ai shpjegoi se gjatë tubimit një “pseudogazetar” e ndërpreu dhe përdori një diskurs përçmues me termin “frizere”. Konjufca tha se pyetjen nuk e dëgjoi saktë për shkak të zhurmës, por i sqaroi personit se puna e frizieres është “fisnike” dhe mban shumë familje në Kosovë.
“Diskutimi im pati vetëm një qëllim specifik: vërejtjen time që një term i tillë të mos përdoret në mënyrë përçmuese. Asnjë diskutim imi nuk ka pasur të bëjë me Presidenten Osmani”, theksoi ai.
Konjufca akuzoi disa media se “e prenë vetëm termin ‘frizere’ dhe më pas ndërtuan rrëfimin e tyre të paqenë”, për, siç tha ai, “kush e di çfarë kalkulimesh”.
Në fund, ai shprehu respekt për Presidenten Vjosa Osmani, me të cilën, siç tha, ka bashkëpunim të gjatë dhe respekt të ndërsjellë.
“Për çdo rast, të gjithë atyre që ky konstrukt i inxhinieruar i luftës speciale i ka lënduar, u kërkoj ndjesë”, përfundoi Konjufca.
