DKA në Kamenicë koordinon përgatitjet për mësimin tërëditor dhe digjitalizimin e shkollave
Drejtoria Komunale e Arsimit në Kamenicë ka mbajtur takim me drejtorët e institucioneve arsimore të komunës, në kuadër të përgatitjeve për fillimin e vitit të ri shkollor dhe avancimin e shërbimeve në arsim.
Takimi u udhëhoq nga drejtori i DKA-së, Selami Klaiqi, së bashku me stafin e drejtorisë, ndërsa fokus kryesor ishte organizimi i procesit të mësimit tërëditor dhe koordinimi i aktiviteteve nëpër shkolla.
Gjatë diskutimeve, vëmendje e veçantë iu kushtua edhe procesit të digjitalizimit të shërbimeve shkollore, me qëllim modernizimin e administratës dhe lehtësimin e qasjes në shërbime për nxënësit, prindërit dhe personelin arsimor.
Me këtë rast, drejtori Klaiqi theksoi rëndësinë e bashkëpunimit të vazhdueshëm ndërmjet shkollave dhe Drejtorisë Komunale të Arsimit, për të siguruar një organizim sa më efikas të procesit mësimor dhe përmirësim të vazhdueshëm të sistemit arsimor në komunë.
