Janina Ymeri flet për mungesën në “tubimin e bashkimit” të LDK-së
Janina Ymeri ka reaguar pas mungesës së saj në “tubimin e bashkimit” të Lidhjes Demokratike të Kosovës, duke mohuar zërat për përçarje brenda partisë pas rikthimit të Vjosa Osmanit në skenën politike.
Anëtarja e LDK-së ka deklaruar se mungesa e saj në takimin e së dielës nuk lidhet me ndonjë pakënaqësi apo ndarje brenda subjektit politik, derisa ka theksuar se do të jetë pjesë e takimeve të ardhshme të partisë.
“Nuk ka përçarje brenda LDK-së. Marr pjesë në tubimin e radhës kur të mbahet. Ne jemi në të njëjtën listë”, ka deklaruar Ymeri në një deklaratë mediale.
Në “tubimin e bashkimit” të mbajtur të dielën munguan edhe disa figura të njohura të LDK-së, përfshirë Avdullah Hotin, Hykmete Bajramin, Kujtim Shalën dhe Imri Ahmetin, gjë që nxiti diskutime për raportet e brendshme në parti.
Lidhur me mungesën e tyre ka folur edhe kryetari i LDK-së, Lumir Abdixhiku, i cili ka minimizuar spekulimet për përçarje. Ai ka deklaruar se të gjithë emrat e përmendur do të jenë pjesë e listës së kandidatëve për deputetë të kësaj partie, duke kërkuar që këto çështje të “mos bëhen temë e paqenë”.
