Ahmet Isufi: 26 vjet Aleancë me vepra për shtetin – raporton TV Gjilani
“Aleanca për Ardhmërinë e Kosovës u krijua në momentin e duhur për demokracinë, tolerancën dhe shtetin e pavarur të Kosovës”, ka shkruar Isufi.
Ai ka theksuar rolin e AAK-së në shtetndërtim nën udhëheqjen e Ramush Haradinajt.
“Nën lidershipin e Ramush Haradinajt, Aleanca ndihmoi në formimin e institucioneve, në bashkëpunim me ShBA-në dhe aleatët, për të arritur pavarësinë dhe krijimin e Ushtrisë, me synim anëtarësimin në NATO dhe BE”, citohet Isufi.
Sipas tij, Aleanca ka dhënë kontribut si në pushtet ashtu edhe në opozitë.
“Në qeverisje dhe në opozitë, Aleanca ishte konstruktive, bashkëpunuese dhe kritike, gjithmonë në interes të shtetit dhe kombit”, ka shtuar ai.
Në fund të statusit, ish-Komandanti i Zonës Operative të Karadakut ka dhënë edhe mesazhin për të ardhmen:
“Për 26 vjet me vizion dhe me vepra. Me reformën e re vazhdojmë idealin e brezave: Kosovë demokratike, e zhvilluar dhe e integruar. Urime!”.
