“S’ka dorëheqje në LDK: Lushaku-Sadriu flet për ‘fushatë paniku’ dhe paralajmëron bashkimin e së djathtës”
Ish-shefja e Grupit Parlamentar të LDK-së, Jehona Lushaku-Sadriu, ka reaguar ndaj, siç e quan ajo, një fushatë të organizuar kundër partisë, e cila sipas saj ka nisur gjatë orëve të natës.
Në një postim në Facebook, ajo ka mohuar kategorikisht zërat për dorëheqje brenda LDK-së, duke theksuar se narrativi i tillë është i fabrikuar. Sipas saj, realiteti është krejt tjetër: një proces në rritje i bashkimit të së djathtës politike.
Lushaku-Sadriu pretendon se ndaj LDK-së janë përdorur metoda si posterë të fabrikuar në gjuhë serbe, lajme të rreme për dorëheqje dhe mesazhe fyese e kërcënuese ndaj anëtarëve të partisë. Këto veprime, sipas saj, reflektojnë frikën nga fuqizimi dhe rritja e mundshme e LDK-së.
“Kur mungojnë argumentet, shpifet. Kur mungon mbështetja, krijohen përçarje që nuk ekzistojnë,” është shprehur ajo, duke shtuar se nuk ka dorëheqje, por një zhvillim që po i shqetëson kundërshtarët: konsolidimin e së djathtës.
Ajo ka akuzuar edhe aktorët politikë që, sipas saj, e kanë çuar vendin në kriza, duke thënë se tash po përpiqen të fshehin dështimet përmes propagandës.
Në fund, Lushaku-Sadriu ka theksuar nevojën për një bashkim politik të së djathtës, të bazuar në vizion zhvillimor dhe patriotik, duke e konsideruar këtë si rrugëdalje nga krizat aktuale në vend.
