Promovohet monografia “Myderriz Haki efendiu” në Gjilan: Rikthehet në vëmendje figura e dijetarit dhe veprimtarit kombëtar
Në Gjilan u promovua monografia “Myderriz Haki efendiu”, kushtuar jetës dhe veprës së myderriz Haki ef. Sermaxhajt. Autorë të veprës janë Aliriza Selmani dhe hfz. Avni Aliu.
Ribotimi i kësaj monografie rikthen në vëmendje një nga figurat më të rëndësishme të dijes dhe çështjes kombëtare.
Në promovim morën pjesë personalitete të jetës fetare, akademike dhe publike, të cilët vlerësuan lart figurën dhe kontributin e Haki efendiut.
Kryetari i Këshillit të Bashkësisë Islame në Gjilan, Naim Aliu, tha se Haki efendiu zë një vend të veçantë në histori dhe është shembull i besimit dhe sakrificës.
Kryetari i Gjilanit, Alban Hyseni, theksoi se trajtimi i figurave të tilla është më se i nevojshëm. “Ato përfaqësojnë sakrificën e një njeriu që jetën e tij ia kushtoi besimit dhe atdheut,” tha Hyseni.
Kryetari i Bashkësisë Islame të Kosovës, Myftiu Naim ef. Tërnava, e cilësoi Haki efendiun si personalitet të rrallë që mishëronte intelektin, besimin dhe dashurinë për atdheun.
“Figura e Haki efendi Sermaxhës mishëron në mënyrë të plotë trinomin themelor të ndërtimit të identitetit tonë kolektiv: arsimimin, besimin dhe atdhedashurinë. Ai përfaqëson tipologjinë e dijetarit erudit që lindi dhe u formësua në gjirin e popullit, duke ia kushtuar tërë jetën edukimit të brezave, konsolidimit të identitetit fetar dhe ruajtjes së vetëdijes kombëtare,” u shpreh Myftiu Tërnava.
Panelistja Sabile Keqmezi-Basha u ndal te dimensioni historik i figurës së tij. “Historia e Haki Sermaxhajt nuk është vetëm individuale, por dëshmi e qëndresës kolektive. Ribotimi i kësaj monografie është i domosdoshëm për të mos u harruar e kaluara,” tha ajo.
Ramadan Shkodra foli për rolin e tij në arsim, duke theksuar se nga puna e Haki efendiut dolën nxënës të shumtë që kontribuuan në shoqëri, si në aspektin fetar, ashtu edhe në atë kombëtar.
Bashkautori Aliriza Selmani tha se nuk është e lehtë të përshkruhet jeta dhe vepra e një figure të tillë. Ndërsa Irfan Sermaxhaj, djali i tij, u shpreh se është kënaqësi e madhe që figura e prindit po vlerësohet vazhdimisht nga personalitete të ndryshme.
Kush ishte Myderriz Haki ef. Sermaxhaj?
Myderriz Haki ef. Sermaxhaj nga Hogoshti ishte dijetar, edukator dhe veprimtar i çështjes kombëtare. Pas Luftës së Dytë Botërore u përfshi në përpjekjet për liri dhe bashkim kombëtar, duke u dalluar si organizator dhe udhëheqës.
U arrestua në vitin 1946 dhe u dënua me 20 vjet burg. Vdiq në burgun e Mitrovicës së Sremit në vitin 1948.
Figura dhe kontributi i tij kujtohen sot përmes kësaj monografie kushtuar jetës dhe veprës së tij.
