Thellohet bashkëpunimi për sigurinë: Drejtori i Mbrojtjes dhe Shpëtimit në takim me Policinë Rajonale të Gjilanit

Drejtori për Mbrojtje dhe Shpëtim, Enver Shabani, ka zhvilluar një takim me drejtorin e Policisë Rajonale në Gjilan, Agron Rukiqi, në kuadër të forcimit të bashkëpunimit ndërinstitucional për rritjen e sigurisë dhe menaxhimin më efikas të situatave emergjente.

Gjatë këtij takimi, palët diskutuan për koordinimin në raste emergjente, funksionalizimin e sistemit të reagimit të shpejtë, si dhe për rolin dhe përgjegjësitë e secilit institucion në menaxhimin e situatave të krizave.

Një fokus i veçantë iu kushtua operativës 112, shkëmbimit të informacionit në kohë reale dhe organizimit të përbashkët të ushtrimeve praktike për reagim në raste zjarresh, fatkeqësish natyrore dhe emergjencash të tjera.

Sipas drejtorit Shabani, në takim u trajtua edhe rëndësia e planifikimit të përbashkët, ngritjes së kapaciteteve profesionale të stafit dhe koordinimit në terren, me qëllim sigurimin e një reagimi sa më të shpejtë dhe efikas në shërbim të qytetarëve.

Në përmbyllje, të dyja palët u dakorduan për thellimin e mëtejmë të bashkëpunimit dhe ndërmarrjen e hapave konkretë në funksion të forcimit të sigurisë publike dhe menaxhimit më të mirë të situatave emergjente në rajonin e Gjilanit.