Ndërron jetë akademik Rexhep Qosja – Kryeministri Albin Kurti: “Vepra e tij nis sot një jetë të re”
Një nga figurat më të shquara të mendimit shqiptar, akademik Rexhep Qosja, ka ndërruar jetë sot, duke lënë pas një trashëgimi të pasur në letërsi, shkencë dhe publicistikë.
Me këtë rast, Kryeministri i Kosovës, Albin Kurti, ka shprehur ngushëllimet e tij përmes një reagimi publik, duke e vlerësuar lart figurën dhe kontributin e Qosjes në kulturën dhe mendimin shqiptar.
“Rexhep Qosja ndërroi jetë sot. Vepra e tij padyshim që do të jetojë shumë më gjatë se shekulli i tij. Mirëpo, fillimisht, vepra e tij nis një jetë të re sot: jetën pa autorin”, ka deklaruar Kurti.
Ai theksoi se dhjetëra libra të Qosjes tashmë do të lexohen ndryshe dhe do të fitojnë kuptime të reja për brezat e ardhshëm, duke përfshirë studime gjuhësore, kritikë letrare, ditarë historikë, romane dhe vepra dramatike.
Kryeministri e cilësoi Qosjen si një nga njohësit më të thellë të rilindësve shqiptarë, duke shtuar se ai ka qenë një figurë unike që ndërthurte rolet e gjuhëtarit, historianit, shkrimtarit dhe mendimtarit.
“Në akademi ishte gjuhëtar e në gjuhë historian, në publik shkrimtar e në shkrim mendimtar, në shoqëri politikan e në politikë dijetar”, u shpreh Kurti, duke nënvizuar dimensionin e gjerë intelektual të tij.
Sipas tij, Qosja do të mbahet mend si një intelektual i paepur, i cili kontribuoi jashtëzakonisht shumë për gjuhën dhe kombin shqiptar, pavarësisht sfidave dhe kritikave që ka hasur gjatë jetës.
Akademik Rexhep Qosja u nda nga jeta pak para se të mbushte nëntë dekada jetë, ndërsa vepra e tij pritet të mbetet një nga shtyllat kryesore të kulturës dhe mendimit shqiptar.
