Në SHFMU “Hanumshahe dhe Tefik Zymberi” në Pasjak shënohet Dita e Shkollës

Në Shkollën Fillore të Mesme të Ulët “Hanumshahe dhe Tefik Zymberi” në Pasjak të Artanës janë zhvilluar aktivitete të shumta në kuadër të shënimit të Ditës së Shkollës.

Aktivitetet nisën me një orë mësimore të veçantë në të gjitha klasat, e cila iu kushtua Epopesë së UÇK-së, me theks të veçantë në “Betejën e Zhegocit”. Nxënësit patën mundësinë të reflektojnë mbi sakrificën dhe vlerat e dëshmorëve, si pjesë e edukimit historik dhe kombëtar.

Në orën 09:30 u zhvilluan homazhe pranë busteve të dëshmorëve Hanumshahe dhe Tefik Zymberi në oborrin e shkollës, ku morën pjesë nxënës, mësimdhënës dhe përfaqësues të shkollës.

Ndërkaq, në orën 10:00, stafi i shkollës, nxënësit dhe familjarët e dëshmorëve, në mënyrë të organizuar, bënë homazhe edhe në Kompleksin e Varrezave të Dëshmorëve në Gjilan.

Nga shkolla bëjnë të ditur se të gjitha aktivitetet u realizuan me përkushtim dhe respekt të thellë për veprën dhe sakrificën e dëshmorëve, duke synuar që këto vlera të përcillen te brezat e rinj.

Drejtoria e shkollës, së bashku me stafin arsimor dhe nxënësit, kanë shprehur falënderim të veçantë për “Studio Foto Fari” për përkrahjen e vazhdueshme në aktivitetet e organizuara nga kjo shkollë.