Distria Krasniqi synon “të artën” e katërt – rikthehet si favorite absolute në Evropian
Kampionati Evropian i xhudos 2026 nis në Tbilisi, ndërsa sytë për Kosovën janë te Distria Krasniqi, e cila garon të enjten në kategorinë deri në 52 kilogramë.
Kampionia në fuqi dhe bartësja e parë hyn në këtë garë si favoritja kryesore, duke synuar medaljen e katërt të artë evropiane, pas triumfeve në vitet 2021, 2024 dhe 2025. Forma e saj mbetet mbresëlënëse, me medalje në 15 garat e fundit dhe paraqitje të vazhdueshme në finale.
Në këtë kategori garojnë 24 xhudiste, ndërsa rivalet kryesore të Krasniqit vlerësohen Odette Giuffrida, Amandine Buchard dhe Reka Pupp.
Në ditën e parë garon edhe Erza Muminoviq në kategorinë deri në 48 kilogramë, e cila synon një rikthim të suksesshëm pas një periudhe pauze. Po ashtu, në kategorinë deri në 52 kilogramë paraqitet edhe Fatjona Kasapi, që po rikthen gradualisht formën pas lëndimit.
Garat vazhdojnë të premten me Laura Fazliu në kategorinë deri në 63 kilogramë dhe me Akil Gjakova e Dardan Cena në kategorinë deri në 73 kilogramë, ku konkurrenca konsiderohet ndër më të fortat.
Në këtë Evropian marrin pjesë 402 xhudistë nga 46 shtete, në një prej ngjarjeve më të rëndësishme të vitit në xhudo.
