LDK me Kryesi të re, pjesë e saj edhe Lutfi Haziri dhe Arbër Ismajli nga Gjilani
Lidhja Demokratike e Kosovës ka njoftuar për emërimin e Kryesisë së re të partisë, në kuadër të procesit të riorganizimit të brendshëm politik. Në përbërjen e re të Kryesisë së LDK-së bëjnë pjesë edhe dy figura të njohura nga Gjilani – Lutfi Haziri dhe Arbër Ismajli.
Sipas komunikatës për media, vendimi është marrë nga kryetari i partisë, Lumir Abdixhiku, në përputhje me autorizimet e dhëna nga Kuvendi i LDK-së, i mbajtur më 31 janar.
“Në përputhje me autorizimet e marra nga Kuvendi i Lidhjes Demokratike të Kosovës, i mbajtur më 31 janar, Kryetari i LDK-së, pas konsultimeve të brendshme, ka marrë vendim për emërimin e Kryesisë së re, si pjesë e riorganizimit të thellë politik”, thuhet në komunikatë.
Sipas LDK-së, përbërja e re synon të reflektojë një kombinim të përvojës dhe energjisë së re politike.
“Kjo përbërje reflekton përvojën institucionale, energjinë e re dhe përbashkimin e të gjitha niveleve si element thelbësor të forcimit partiak. Kryesia e re është në funksion të forcimit të organizimit të brendshëm dhe rritjes së efikasitetit në vendimmarrje”, thuhet më tej.
Në krye të Kryesisë do të jetë Lumir Abdixhiku, ndërsa pjesë e saj janë dhjetëra figura të njohura të partisë, përfshirë edhe Lutfi Hazirin dhe Arbër Ismajlin nga Gjilani.
Në këtë përbërje bëjnë pjesë: Alban Zogaj, Alush Gashi, Anton Quni, Arbër Ismajli, Ardian Shala, Arjeta Salihu Abazi, Armend Zemaj, Avdullah Hoti, Berat Rukiqi, Besian Mustafa, Bexhet Xheladini, Doarsa Kica Xhelili, Doruntinë Maloku, Ekrem Hyseni, Ermal Sadiku, Fadil Hadergjonaj, Festim Kabashi, Gazmend Muhaxheri, Hykmete Bajrami, Ilir Ferati, Izet Sadiku, Jehona Lushaku Sadriu, Kujtim Shala, Lutfi Haziri, Paris Guri, Ruzhdi Shehu, Shefqet Shehu, Shkëmb Manaj, Sibel Halimi, Sokol Haliti, Sokol Havolli, Ukë Rugova, Visar Azemi dhe Xhafer Gashi.
LDK-ja thekson se Kryesia e re do të ketë rol kyç në drejtimin politik dhe organizativ të partisë.
“Kryesia e re do të ketë përgjegjësi të plotë për drejtimin politik dhe organizativ të partisë, në përputhje me programin dhe objektivat tona”, thuhet në komunikatë.
Tutje bëhet e ditur se kjo përbërje është pjesë e një faze kalimtare organizative, që synon konsolidimin e strukturave dhe forcimin e lidhjes mes qendrës dhe degëve.
Po ashtu, LDK-ja ka paralajmëruar se Kryesia mund të plotësohet edhe më tej në ditët në vijim, pas konsultimeve shtesë.
Në kuadër të këtij procesi, është bërë e ditur se së shpejti do të themelohet edhe një trup këshillëdhënës, i përbërë nga figura të shquara të partisë me përvojë institucionale dhe profesionale.
LDK-ja ka theksuar se mbetet e përkushtuar ndaj forcimit të brendshëm dhe ndërtimit të një alternative politike për qytetarët e Kosovës.
