Vjedhje e madhe në Gjilan – zhduket një ton bakër, dëmi rreth 14 mijë euro
Një ngjarje e rëndë kriminale ka tronditur Gjilanin, ku persona të paidentifikuar kanë depërtuar në ambientet e kompanisë “EUROCABLE” SHPK dhe kanë marrë një sasi të madhe materiali me vlerë të konsiderueshme.
Ngjarja ka ndodhur gjatë natës mes 29 dhe 30 marsit 2026, në rrugën “Enver Rexhepi”, dhe është raportuar nga pronarët më 30 mars. Sipas informacioneve fillestare, autorët dyshohet se kanë hyrë në objekt përmes një dritareje në pjesën e pasme, duke përdorur forcë për të depërtuar brenda.
Nga ambientet e kompanisë, ata kanë marrë rreth një (1) ton fije bakri, me vlerë të përafërt 14 mijë euro, sipas deklarimit të pronarit. Rasti është cilësuar si vjedhje e rëndë, ndërsa hetimet janë duke u zhvilluar nga njësitet përkatëse të policisë dhe me urdhër të prokurorit kujdestar.
Autorët mbeten ende të paidentifikuar, dhe hetimet për zbardhjen e plotë të rastit vazhdojnë.
