Nxënësit e katër shkollave përfitojnë nga programi “Drejt Malit” në Brezovicë
Drejtoria e Arsimit, me mbështetjen e Ministrisë së Arsimit dhe Shkencës dhe Ministrisë së Shëndetësisë, po realizon programin “Drejt Malit”, ku fëmijët e katër shkollave fituese në garën e futsallit po shijojnë aktivitete dimërore në zonën turistike të Brezovicës – shkruan TV Gjilani.
Gjatë qëndrimit të tyre, nxënësit po përdorin pistën e skijimit, duke mësuar teknikat bazë të këtij sporti. Përveç aktiviteteve në natyrë, në mbrëmje zhvillohen edhe gara jashtëkurrikulare, përfshirë shah dhe pingpong, ku nxënësit kanë treguar shpirt të lartë garues dhe bashkëpunim. Fituesit në pingpong morën vendin e parë, ndërsa në shah vendin e dytë, dhe u shpërblyen me mirënjohje, medalje dhe dhurata simbolike.
Programi realizohet nga Federata e Sportit Shkollor e Republikës së Kosovës, në bashkëpunim me Federatën Skitare të Kosovës, me synim promovimin e Parkut Kombëtar Sharr dhe zonës turistike të Brezovicës.
Në këtë aktivitet po marrin pjesë nxënës nga shkollat:
- “Xhavit Ahmeti” – Hodonoc
- “Metush Krasniqi” – Rogoçic
- “Asllan Thaqi” – Karaçevë e Poshtme
- “Avni Rrustemi” – Karaçevë e Epërme
Nxënësit janë shoqëruar nga arsimtarët Afrim Morina, Florim Kryeziu, Lulzim Dermaku dhe Enver Sermagjaj, të cilët po kujdesen për realizimin e plotë dhe të sigurt të aktivitetit.
