URIMI PËR FITËR-BAJRAM NGA KËSHILLI I BASHKËSISË ISLAME NË GJILAN
URIMI PËR FITËR-BAJRAM NGA KËSHILLI I BASHKËSISË ISLAME NË GJILAN.
Të nderuar vëllezër dhe motra!
Nesër, më 20 mars 2026, është dita e parë e Fitër-Bajramit, ndaj me këtë rast kam kënaqësinë që, në emër të Këshillit të Bashkësisë Islame në Gjilan dhe në emrin tim personal, t’i përgëzoj të gjithë besimtarët për përmbushjen e njërit prej obligimeve kryesore të fesë islame, dhe t’ua uroj Fitër-Bajramin, duke e lutur Allahun e Madhërishëm që të na ketë pranuar agjërimin, lutjet, ibadetet dhe punët e mira që i kemi bërë gjatë këtij muaji, në shenjë respekti ndaj Krijuesit Fuqiplotë.
Festa e Fitër-Bajramit ngërthen në vete rikujtimin dhe përkushtimin ndaj Krijuesit të gjithësisë, të cilin besimtarët me të madhe e shprehën edhe gjatë muajit të madhëruar të Ramazanit. Na bashkoi adhurimi ndaj Zotit, bamirësia, mirëkuptimi, zeqati e sadakaja, solidariteti dhe përkujdesja ndaj të varfërve, ndaj nesër krenarë e ballëhapur e festojmë Fitër-Bajramin.
Le të frymëzohemi edhe me këtë rast nga këto momente më të bukura për besimtarin, ngase ai sot përfundon agjërimin e muajit të Ramazanit, kryen një obligim që i ka caktuar Zoti, dhe me të drejtë pret të shijojë begatitë që ka dhuruar i Madhi Zot për njeriun. Prandaj duhet të vazhdojmë me vepra të mira, në mënyrë që Zoti të jetë i kënaqur me veprat tona, ngase të gjithë bashkë jemi përgjegjës para Zotit për veprat tona.
Të nderuar qytetarë, vëllezër e motra!
Kurani mbështet konceptet e moralit, dashurisë e mëshirës, përkushtimit e sakrificës, tolerancës dhe paqes. Besimtari i pajisur me këto virtyte përhap dashuri, respekt, harmoni dhe kënaqësi për të gjithë njerëzit që janë të prirë të punojnë vepra të mira.
Islami, nëpërmjet agjërimit dhe adhurimeve të tjera, i ka pastruar shpirtrat e njerëzve nga urrejtja e xhelozia, i ka dëlirësuar nga egoizmi, pangopësia dhe koprracia, duke i udhëzuar në respekt ndaj njëri-tjetrit, në ngritjen e një shoqërie humane, në të cilën gjykon dashuria hyjnore e ngritur mbi principe të fuqishme të drejtësisë, bamirësisë e mëshirës.
Nisur nga këto parime, unë ju porosis të gjithëve që të shtrini dorën e ndihmës ndaj skamnorëve, jetimëve dhe të gjithë atyre që janë në nevojë. Ashtu si ishim të bashkuar, humanë dhe të dinjitetshëm, tolerantë e të disiplinuar gjatë muajit të agjërimit, ashtu duhet të jemi bashkë dhe unik gjithëherë për të çuar përpara vendin tonë, atje ku synojmë të gjithë.
Në fund, më lejoni që edhe një herë t’ua uroj nga zemra Fitër-Bajramin të gjithë vëllezërve e motrave tona, kudo që gjenden.
Me fat ju qoftë festa Fitër-Bajrami!
