A u braktis GUXO në Deçan e Pejë? Vjen reagimi i partisë
Partia GUXO ka reaguar ndaj raportimeve për dorëheqje në masë nga strukturat e saj në Deçan dhe Pejë, duke i cilësuar ato si të pavërteta dhe tendencioze.
Përmes një komunikate për publikun, kjo parti ka thënë se spekulimet që kanë qarkulluar së fundmi në media nuk reflektojnë realitetin dhe, sipas saj, synojnë të krijojnë një perceptim të rremë në opinionin publik.
Sipas GUXO-s, tre persona nga Peja që po përmenden në këto pretendime kanë paraqitur dorëheqje disa herë më parë dhe tashmë ka më shumë se një vit e gjysmë që nuk janë aktivë në strukturat e partisë.
“Tre individët nga Peja, të cilët po përmenden në këto pretendime, kanë paraqitur dorëheqje plot shtatë herë deri më tani dhe ka më shumë se një vit e gjysmë që janë larguar nga çdo aktivitet i Partisë GUXO”, thuhet në reagim.
Partia po ashtu ka kundërshtuar raportimet se kryesia e degës në Deçan ka braktisur partinë. Sipas komunikatës, vetëm dy anëtarë të kësaj dege janë tërhequr nga aktivitetet në parti.
“Përkundër titujve mediatikë se kryesia e degës në Deçan ka braktisur Partinë GUXO, e vërteta është se vetëm dy anëtarë të kësaj dege janë tërhequr nga partia”, thuhet më tej në reagim.
Nga kjo parti është bërë e ditur se gjatë ditëve në vijim do të dalin me njoftime më të detajuara për këto zhvillime, duke paralajmëruar se do të demantojnë çdo dezinformatë që, sipas tyre, po qarkullon në opinion.
Ndërkohë, është njoftuar se të hënën, më 16 mars, kryetarja e Partisë GUXO do të paraqesë para opinionit publik qëndrimet e plota të partisë lidhur me këto zhvillime.
