Nxënësit vizitojnë Stacionin Policor në Gjilan në kuadër të 18-vjetorit të Pavarësisë
Me rastin e shënimit të 18-vjetorit të Pavarësisë së Republikës së Kosovës, Stacioni Policor në Gjilan ka mirëpritur një grup nxënësish të klasave I–V nga Shkolla Fillore “Liria” në fshatin Uglar dhe Shkolla Fillore “Sadullah Brestovci” në Gjilan, të shoqëruar nga personeli mësimor i këtyre institucioneve arsimore.
Kjo vizitë u realizua me qëllim të njohjes më të afërt të nxënësve me organizimin, funksionimin dhe misionin e Policia e Kosovës, si dhe me rolin dhe përgjegjësitë e saj në ruajtjen e rendit dhe sigurisë publike.
Gjatë qëndrimit në stacion, nxënësit u informuan rreth detyrave policore, pajisjeve që përdoren në përmbushjen e obligimeve zyrtare, si dhe procedurave bazë të punës policore. Po ashtu, u theksua rëndësia e bashkëpunimit ndërmjet policisë, shkollës dhe komunitetit në ndërtimin e një mjedisi të sigurt.
Zyrtarët policorë zhvilluan bashkëbisedime me nxënësit, duke ofruar këshilla praktike lidhur me sigurinë në shkollë, në rrugë, në familje dhe në hapësira publike, me synim parandalimin e rreziqeve dhe rritjen e vetëdijes qytetare që në moshë të hershme.
Policia e Kosovës mbetet e përkushtuar në forcimin e bashkëpunimit me institucionet arsimore dhe komunitetin, me synim edukimin dhe ndërgjegjësimin e brezave të rinj mbi rëndësinë e sigurisë, rendit publik dhe respektimit të ligjit.
