Pas katër ditësh, Policia arreston shoferin që iku pas aksidentit në Shtime

Policia e Kosovës ka identifikuar dhe arrestuar personin e dyshuar për shkaktimin e një aksidenti trafiku në Shtime, i cili pas goditjes së një këmbësori ishte larguar nga vendi i ngjarjes.

Sipas njoftimit zyrtar të Policisë, aksidenti ka ndodhur më 4 shkurt 2026, rreth orës 18:25, në rrugën magjistrale Shtime–Lipjan, konkretisht në fshatin Davidovc, ku një automjet ka goditur një këmbësor dhe drejtuesi i mjetit nuk është ndalur për t’i ofruar ndihmë, por është larguar në drejtim të panjohur.

Si pasojë e aksidentit, është lënduar një këmbësor, mashkull 46-vjeçar, i cili fillimisht ka marrë ndihmë mjekësore në Qendrën e Mjekësisë Familjare në Shtime, më pas është transferuar në Qendrën Emergjente në Ferizaj dhe për tretman të mëtejmë në Qendrën Klinike Universitare të Kosovës. Sipas autoriteteve, i lënduari është liruar nga spitali dhe ndodhet jashtë rrezikut për jetë.

Në vendin e ngjarjes kanë dalë menjëherë patrullat e Stacionit Policor në Shtime, Njësia e Komunikacionit Rrugor si dhe hetuesit e aksidenteve, ndërsa në procesin e identifikimit janë angazhuar edhe hetuesit nga Sektori Rajonal i Hetimeve.

Pas një pune intensive hetimore dhe analizimit të kamerave të sigurisë, më 8 shkurt 2026, rreth orës 18:30, policia ka arritur të identifikojë shoferin dhe automjetin e dyshuar në këtë rast.

I dyshuari është A. A., 41 vjeç, shtetas i Republikës së Kosovës, ndërsa automjeti i përfshirë në aksident është VW Golf, ngjyrë e zezë, me targa vendore.

Më 9 shkurt 2026, i dyshuari është intervistuar nga hetuesit policorë të aksidenteve dhe, me vendim të prokurorit të shtetit, është liruar në procedurë të rregullt, ndërsa hetimet vazhdojnë për veprën penale “Shkaktim i aksidentit të trafikut me lëndime trupore”./Reporteri.net/