QKMF Kamenicë – Pas 45 vjetësh shërbimi në shëndetësi, pensionohet kryeinfermierja Nafije Ajvazi
Pas një përvoje të gjatë dhe të përkushtuar 45-vjeçare në Qendrën Kryesore të Mjekësisë Familjare (QKMF), është pensionuar infermierja e nderuar Nafije Bugacku Ajvazi, e cila për më shumë se 20 vite radhazi ka ushtruar detyrën e kryeinfermieres, raporton TV Gjilani.
Gjatë gjithë karrierës së saj profesionale, Ajvazi është dalluar për përkushtim, profesionalizëm dhe humanizëm, duke lënë gjurmë të pashlyeshme në shërbimin shëndetësor dhe tek kolegët e saj. Ajo ka qenë udhërrëfyese dhe mbështetje e vazhdueshme për stafin, si dhe shembull i përkushtimit ndaj pacientëve.
Nafije Bugacku Ajvazi ka përfunduar shkollimin e mesëm në drejtimin e mjekësisë së përgjithshme në Shkollën e Mesme të Mjekësisë “Asllan Elezi” në Gjilan, e cila në atë kohë funksiononte në kuadër të shkollës “Zenel Hajdini”, si drejtim profesional mjekësor.
Pas përfundimit të shkollimit, ajo ka kontribuar pandërprerë në shëndetësinë primare dhe sekondare të Komunës së Kamenicës, duke shërbyer me përkushtim në qytet dhe në fshatrat përreth.
Me rastin e pensionimit, Ajvazi ka pranuar mirënjohje, vlerësime dhe falënderime të shumta për angazhimin e saj ndër vite, si nga menaxhmenti dhe kolegët e QKMF-së në Kamenicë, ashtu edhe nga pacientë e qytetarë të shumtë.
Në emër të institucionit dhe gjithë stafit, QKMF-ja ka shprehur mirënjohje të thellë për kontributin e dhënë, duke i uruar shëndet, mirëqenie dhe një pension të qetë e të merituar.
