SHFMU “Mulla Idris Gjilani” në Velekincë organizoi takim motivues të nxënësve me emra të shquar të futbollit

SHFMU nga Velekinca e Gjilanit ka organizuar një takim të nxënësve e personelit të saj me ish-futbollistë nga Komuna e Gjilanit, të cilët kanë lënë gjurmë të pashlyeshme në futbollin e Gjilanit, Kosovës e në arenën ndërkombëtare.

Në mesin e futbollistëve të ftuar për këtë takim, ishin disa nga emrat e njohur që i përkasin gjeneratave të ndryshme, por që kanë qenë “vulë” indentitare e futbollit: Muharrem Sahiti, Selajdin Jerliu – Coli, Ismet Ramushi dhe Premton Muja, si dhe Armend Misini nga Lidhja Rajonale e Futbollit të Gjilanit.

NJOFTIMI I SHKOLLËS:

LEGJENDAT E FUTBOLLIT GJILANAS

Në ambientet e shkollës sonë u organizua një aktivitet i veçantë me pjesëmarrjen e figurave të spikatura të futbollit gjilanas:

1. Muharrem Sahiti,

2. Selajdin Jerliu – Coli

3. Ismet Ramushi dhe

4. Premton Muja.

Aktiviteti u hap me fjalë përshëndetëse, ndërsa më pas drejtori i shkollës z. Zaim Zymeri mbajti fjalën e rastit, duke vlerësuar kontributin e tyre të çmuar në sport dhe rolin e tyre frymëzues për brezat e rinj.

Futbollistët e ftuar prezantuan karrierën dhe përvojën e tyre profesionale, duke ndarë histori suksesi, sfida dhe mesazhe motivuese për nxënësit. Nxënësit treguan interesim të madh, duke parashtruar pyetje të ndryshme dhe duke krijuar një bashkëbisedim të hapur e frymëzues.

Gjatë aktivitetit u shfaq një video–insert me momente nga ndeshjet dhe rrugëtimi sportiv i futbollistëve, e cila u prit me emocion dhe entuziazëm nga të pranishmit.

Në përmbyllje, Drejtori i Shkollës ndau mirënjohje për të ftuarit, në shenjë respekti dhe falënderimi për kontributin e tyre të vyer dhe për mesazhet motivuese që sollën në shkollën tonë.

Velekincë, Janar 2026