Ndriçimi publik jashtë funksionit në lagjen “Marie Shllaku”, qytetarët kërkojnë ndërhyrje urgjente
Prej disa ditësh, ndriçimi publik në lagjen “Marie Shllaku” është plotësisht jashtë funksionit, duke shkaktuar shqetësim të madh tek banorët e zonës.
Fillimisht, sipas qytetarëve, rreth gjysma e dritave kanë qenë të prishura, ndërsa aktualisht asnjë llampë nuk funksionon në këtë lagje.
Mungesa e ndriçimit gjatë orëve të mbrëmjes e bën dukshmërinë jashtëzakonisht të ulët, duke rritur ndjeshëm ndjenjën e pasigurisë. Situata rëndohet edhe më tej nga prania e qenve endacakë, të cilët shpeshherë ua pamundësojnë qytetarëve daljen me këmbë, qoftë për të shkuar në market apo për të kryer shërbime të tjera të përditshme.
Banorët kërkojnë ndërhyrje urgjente nga institucionet përgjegjëse për rregullimin e ndriçimit publik, duke theksuar se problemi po zgjat dhe po rrezikon sigurinë dhe qetësinë e tyre, veçanërisht në orët e mbrëmjes.
Ata shpresojnë që kjo çështje të trajtohet sa më parë, në mënyrë që lagjja “Marie Shllaku” të rikthehet në kushte normale dhe të sigurta për të gjithë banorët. /TV Gjilani/
