Lutfi Haziri kërkon besimin qytetar, premton intensifikim të përfundimit të autostradës Prishinë-Gjilan-Dheu i Bardhë
Në prag të zgjedhjeve nacionale të 28 dhjetorit 2025, gjegjësisht fillimit të fushatës zyrtare më 17 dhjetor, edhe tek LDK në Gjilan vërehet një mobilizim i shtuar parapërgatitor.
Në këtë kontekst kreu i degës së LDK-së Lutfi Haziri, ka postuar një status në rrjetin e tij social në facebook, ku kërkon besimin qytetarë.
“Besimin tuaj, do t’ua kthejmë me punë të hajrit e dashni për Gjilanin dhe Anamoravën!”, ka shkruar ai.
Teksti i plotë:
Të dashur qytetarë,
Sot më shumë se kurrë, kërkoj që t’i bashkangjiteni thirrjes sonë të madhe për ndryshimin e kësaj gjendjeje në Gjilan, Anamoravë e në Kosovë.
Na jepni mbështetje, na jepni zemër dhe ne do të kujdesemi për projektet zhvillimore të kësaj pjesë të juglindjes, veçanërisht për përfundimin sa më të shpejt të autostradës Prishtinë-Gjilan-Dheu i Bardhë, që qeveria e në largim e shndërroi në autolloç.
Na duhet përkrahje në formë plebishitare për rikthimin e madh të LDK-së e për kthimin e kujdesit për Gjilanin dhe Anamoravën në Kuvendin e Republikës.
Prandaj, u kërkoj me sinqeritetin më të madh grave e burrave, të rinjve e të rejave, arsimtarëve, mjekëve, inxhinierëve, sportistëve, njerëzve të kulturës, bujqve, fermerëve e prodhuesve, që t’i bashkangjiteni kauzës sonë për t’ia kthyer dinjitetin qytetit të kryengritësve më të mëdhenj për lirinë e shqiptarëve.
Lista jonë në Gjilan është lista më përfaqësuese, është listë me të cilën ju do të krenoheni që i keni dhënë besimin për t’i artikuluar në mënyrën më të mirë kërkesat tuaja në Kuvendin e Republikës së Kosovës.
Besimin tuaj, do t’ua kthejmë veç me dashni e punë të hajrit për Gjilanin!
Zgjedhni shpresën. Zgjedhni LDK-në!
