Presidenti Begaj në Prishtinë: 50 vjet Akademi e Kosovës, 50 vjet dritë dhe qëndresë e dijes shqiptare
Presidenti i Republikës, Bajram Begaj mori pjesë këtë të mërkurë në Prishtinë në ceremoninë e 50-vjetorit të themelimit të Akademisë së Shkencave dhe Arteve të Kosovës, një institucion që ka shënuar gjysmëshekullin e kontributit shkencor e kombëtar.
“Sot kremtojmë rrugëtimin gjysmëshekullor të dijes, sakrificës dhe përkushtimit intelektual, qytetar dhe kombëtar. Festojmë jetën e një institucioni që lindi në kushte të vështira, por që u ngrit në lartësinë e institucioneve të tjera simotra të kombeve të zhvilluara”, u shpreh Presidenti Begaj në këtë përvjetor jubile.
Kreu i shtetit nderoi studiuesit dhe akademikët shqiptarë, të gjallë e të ndjerë, që me punë e sakrifica ruajtën idealin e dijes dhe i hapën rrugë zhvillimit shkencor.
Presidenti Begaj theksoi se Shqipëria ka qenë gjithmonë pranë elitës intelektuale të Kosovës në momentet më të vështira, ndërsa vlerësoi realitetin historik që po përjetojnë sot shqiptarët: “Pas shumë dekadave përpjekjesh, sakrificash dhe falë ndihmës së çmuar të Shteteve të Bashkuara të Amerikës dhe partnerëve evropianë, shqiptarët sot jetojnë një moment të paprecedent: kemi dy shtete shqiptare dhe dy akademi shkencore që i shërbejnë një kombi. Është hera e parë në historinë tonë që dija shqiptare mund të zhvillohet pa pengesa, në liri dhe në bashkëpunim.”
Ai nënvizoi se ky bashkëpunim u jep shqiptarëve siguri dhe forcë për të ecur përpara, “për t’u ngritur si komb përmes dijes, krijimtarisë dhe shpirtit”.
Duke vlerësuar arritjet e Akademisë së Kosovës dhe partneritetet e saj me qendra kërkimore në BE dhe SHBA, Presidenti Begaj tha se ky institucion ka përfaqësuar denjësisht vendin në arenën ndërkombëtare dhe është bërë pjesë e komunitetit botëror të dijes. Ai vuri në dukje edhe rolin e Diasporës në projektet e ndërkombëtarizimit të Akademisë.
Presidenti rikujtoi edhe kushtet e vështira në të cilat kanë punuar akademikët e Kosovës për dekada të tëra: “Akademikët e Kosovës kanë punuar me atdhedashuri sublime, pasi kanë qenë në kushte të vështira, në censurë dhe të privuar nga mjetet më elementare të punës shkencore.”
Në mbyllje, Presidenti Begaj përcolli një mesazh të posaçëm për brezin e ri të studiuesve shqiptarë: “Brezi i ri duhet të bëhet gjenerata që e çon përpara idealin e dijes.
Ata duhet të kërkojnë më shumë, të studiojnë më thellë, të mos kënaqen me të lehtën, por të gjejnë forcën për t’iu përkushtuar dijes me seriozitet, me kureshtje dhe me shpirt. E ardhmja e kombit ndërtohet nga ata që besojnë se dija është mjeti më i fuqishëm i zhvillimit.”
