Masat e ftohta polare dhe cikloni sjellin reshje të reja dhe ulje të temperaturave, pritet borë edhe në ultësira
Java e fundit e nëntorit do të mbetet nën ndikimin e kushteve të paqëndrueshme atmosferike dhe të masave më të ftohta, të cilat vijnë nga veriperëndimi i kontinentit.
Nën këto kushte, dita e hënë u karakterizua me diell dhe vranësira, ndërsa në mbrëmje pritet shtim i vranësirave dhe gradualisht rikthim i reshjeve lokale gjatë natës.
Dita e martë do të vijojë me vranësira dhe intervale me diell, ndërsa në Rrafshin e Dukagjinit ato do të jenë më të përqendruara, duke sjellë herë pas here reshje lokale shiu, megithatë edhe në pjesë të tjera të vendit mund të ketë reshje të izoluar.
Të mërkurën parashikohet mot kryesisht i vranët, përderisa pritet shtrirja e reshjeve të reja të shiut në të gjithë vendin, si pasojë e ciklonit të paraprirë nga fronti i ftohtë.
Të enjten do të kemi gradualisht depërtimin e masave të ftohta, me ç’rast moti fillimisht do të karakterizohet me reshje shiu, e më pas lokalisht ato do të shndërrohen në shi të ngrirë, shqotë dhe borë, përfshirë edhe një pjesë të madhe të zonave të ulëta.
Dita e premte dhe e shtunë do të mbetet e vranët dhe lokalisht me reshje të pakta shiu dhe bore. Temperaturat do të fillojnë të shënojnë një ngritje të lehtë të shtunën.
E diela parashikohet me diell dhe vranësira, përderisa temperaturat do të shënojnë një ngritje të mëtejshme, por të lehtë.
Era do të fryjë nga drejtime të ndryshme dhe herë pas here do të jetë mjaft e fuqishme lokalisht deri në mesjavë, me shpejtësi prej 15–60 km/h.
Temperaturat minimale do të lëvizin prej -1 deri në 10°C, ndërsa ato maksimale prej 1 deri në 15°C. Vlerat më të larta maksimale mbesin deri të mërkurën, ndërsa nga e enjtja pësojnë ulje të ndjeshme.
/MeteoKosova/
