Duka ëndërron më të mirën: “Mund të fitojmë ndaj Anglisë dhe të kapim vazon e dytë”
Presidenti i FSHF-së, Armand Duka, foli pas fitores historike të Shqipërisë 1-0 ndaj Andorrës, një fitore që siguroi kualifikimin e kuqezinjve në Play-Off të Kupës së Botës.
“I gjithë grupi ka pasur besim, dhe goli i Asllanit që na çon në Play-Off mbahet mend gjatë. Jam i bindur se kemi ndeshje të vështira përpara, por skuadra është e fortë dhe kompakte,” tha Duka.
Presidenti lavdëroi gjithashtu brezin e ri të futbollistëve, duke theksuar rritjen dhe potencialin e tyre:
“Këta djem meritojnë shumë më shumë. Nëse arrijnë në Botëror, do të jetë historike dhe fantastike për të gjithë ne.”
Duka vuri në dukje edhe rolin e trajnerit:
“Është një ish-lojtar shumë i mirë dhe e di rëndësinë e ndeshjeve. Nuk ka presion për të. Kualifikimi është rezultat i punës së përbashkët të trajnerit dhe lojtarëve.”
Ai përfundoi me synimin për të ardhmen dhe mundësinë për të përmirësuar renditjen në short:
“Pse jemi vazo e tretë? Mund të kalojmë në vazon e dytë nëse mundim Anglinë. Tani jemi në Play-Off, përfunduam një cikël dhe hapim një fazë tjetër. Të shijojmë këtë arritje historike.”
