Universiteti Publik “Kadri Zeka” nënshkruan Partnership Agreement për projektin ndërkombëtar “DUALKO” në kuadër të programit ERASMUS+
Universiteti Publik “Kadri Zeka” në Gjilan (UKZ) ka nënshkruar Marrëveshjen e Partneritetit për projektin e ri ndërkombëtar “DUALKO – Strengthening of relations between HEIs and industry sector through Dual Education in Albania and Kosovo with the focus on ICT”, në kuadër të programit ERASMUS-EDU-2025-CBHE-STRAND-2, me numër granti 101178768.
Ky projekt, i bashkëfinancuar nga Bashkimi Evropian, ka për qëllim forcimin e lidhjeve ndërmjet institucioneve të arsimit të lartë dhe sektorit të industrisë, përmes zhvillimit të edukimit dual, me fokus të veçantë në teknologjitë e informacionit dhe komunikimit (ICT), në Shqipëri dhe Kosovë.
Koordinatori i projektit është Universiteti i Elbasanit “Aleksandër Xhuvani” (UNIEL) nga Shqipëria, ndërsa Universiteti Publik “Kadri Zeka” në Gjilan është partner përfaqësues nga Kosova. Projekti përfshin një rrjet bashkëpunimi të gjerë ndërmjet institucioneve të arsimit të lartë dhe partnerëve të industrisë nga të dy vendet, me qëllim që të krijohen programe dhe praktika që lidhen drejtpërdrejt studimet me tregun e punës.
Rektori i UKZ-së, Prof. Asoc. Dr. Artan Dërmaku, së bashku me ekipin e tij menaxhues, ka nënshkruar këtë marrëveshje, e cila shënon një hap të rëndësishëm në rrugën e ndërkombëtarizimit dhe modernizimit të UKZ-së.
Në kuadër të projektit DUALKO, UKZ do të angazhohet në:
Zhvillimin e partneriteteve me biznese dhe kompani të sektorit të ICT-së, krijimin e mundësive për praktika profesionale dhe mësim dual për studentët, fuqizimin e kapaciteteve të stafit akademik në lidhjen e studimeve me tregun e punës, shkëmbimin e përvojave me universitete dhe partnerë ndërkombëtarë, etj.
Ky është një tjetër projekt i rëndësishëm ndërkombëtar që i shtohet portofolit të bashkëpunimeve strategjike të Universitetit Publik “Kadri Zeka”, duke dëshmuar përkushtimin e udhëheqjes universitare në rritjen e cilësisë akademike, zhvillimin e inovacionit dhe fuqizimin e rolit të universitetit në zhvillimin ekonomik e shoqëror të vendit.
Projekti DUALKO do të implementohet gjatë periudhës 2025–2028 dhe financohet nga Komisioni Evropian përmes programit ERASMUS+ Capacity Building in Higher Education (CBHE).
