Kështu duken fletëvotimet e balotazhit për kryetarë të 18 komunave

Komisioni Qendror i Zgjedhjeve ka publikuar fletëvotimet të cilat do të shpërndahen në vendvotime, në të cilat do të mbahet raundi i dytë i zgjedhjeve për Kryetarët e 18 komunave.

Në fletëvotimet e raundit të dytë gara zhvillohet vetëm mes dy kandidatëve që arritën të fitojnë më së shumti vota në raundin e parë të 12 tetorit.

Shtypja e fletëvotimeve është bërë në Slloveni, ndërkaq shpërndarja e tyre planifikohet të bëhet një ditë para ditës së zgjedhjeve.

Zëdhënësi i KQZ-së, Valmir Elezi, ka treguar se “sipas vendimit të KQZ-së janë shtypur 1,158,015 fletëvotime apo rreth 16% më pak se numri i përgjithshëm i qytetarëve me të drejtë vote në këtë raund. Në këtë numër përfshihen fletëvotimet për vendvotimet e rregullta, votimin me kusht, Votimin e Personave e Nevoja të Veçanta, fletëvotimet rezervë dhe për votimin me postë”.

Raundi i dytë i zgjedhjeve për Kryetarë të Komunave do të mbahet në këto 18 komuna: Gjakovë, Gjilan, Dragash, Kaçanik, Klinë, Fushë Kosovë, Mitrovicë e Jugut, Obiliq, Rahovec, Pejë, Prishtinë, Prizren, Suharekë, Viti, Vushtrri, Junik, Mamushë dhe Kllokot.

Votimi do të zhvillohet në 525 Qendra të Votimit, me gjithsej 1,648 vendvotime, prej të cilave 507 qendra me 1,628 vendvotime për votimin e rregullt dhe 18 qendra, nga një për çdo komunë ku mbahet rrethi i dytë i zgjedhjeve, me 20 vendvotime, për të mundësuar votimin me kusht.