U mbajt Kuvendi Zgjedhor i Sindikatës së UKZ-së
Në Universitetin Publik “Kadri Zeka” në Gjilan është mbajtur Kuvendi Zgjedhor Sindikatës së Bashkuar të Arsimit, Shkencës dhe Kulturës në Kosovë (SBASHK) dega në SU të UKZ-së.
Në këtë takim morën pjesë stafi administrativ i universitetit, përfaqësues të SBASHK-ut qendror, ndër ta Bardh Bardhi, si dhe Afrim Qela nga Sindikata e Universitetit të Mitrovicës “Isa Boletini”.
Punimet e Kuvendit i hapi Refik Ibrahimi, kryetar në detyrë i Sindikatës në UKZ, i cili përshëndeti të pranishmit dhe prezantoi rendin e ditës, i cili u miratua me unanimitet nga anëtarët.
Sipas rendit të ditës, z. Ibrahimi prezantoi raportin e punës dhe raportin financiar për periudhën 2021–2025, të cilat u miratuan nga kuvendarët me votim të hapur.
Pas prezantimeve, Kuvendi Zgjedhor me votim unanim zgjodhi udhëheqjen e re të Sindikatës së UKZ-së në këtë përbërje:
– Kryetar: Betim Berisha
– Nënkryetare: Kosovare Shabani
– Anëtarë të kryesisë: Kushtrim Demi, Petrit Canaj dhe Arlinda Hasani
Po ashtu, Kuvendi zgjodhi Këshillin Mbikëqyrës, i përbërë nga Diana Kerçeli, Egzona Rexhepi dhe Valon Syla.
Në fund të punimeve, kryetari i sapozgjedhur Betim Berisha falënderoi anëtarët e kuvendit për besimin dhe mbështetjen, duke theksuar rëndësinë e bashkëpunimit dhe përfaqësimit të dinjitetshëm të stafit të UKZ-së.
Në emër të SBASHK-ut, Bardh Bardhi përgëzoi strukturën e re të zgjedhur dhe shprehu gatishmërinë për vazhdimin e bashkëpunimit të ngushtë ndërmjet sindikatës qendrore dhe asaj të Universitetit Publik “Kadri Zeka”.
