Nënshkruhet marrëveshja e parë shumëpalëshe ndëruniversitare në Kosovë
Universitetet publike të Republikës së Kosovës, kanë nënshkruar marrëveshjen e parë shumëpalëshe ndëruniversitare në nivel kombëtar, duke shënuar një moment historik për arsimin e lartë në vend.
Në këtë ngjarje me rëndësi të veçantë mori pjesë edhe Rektori i Universitetit Publik “Kadri Zeka” në Gjilan, Prof. Asoc. Dr. Artan Dermaku.
Marrëveshja, e cila u nënshkrua nga rektorët e Universitetit Publik “Kadri Zeka” Gjilan, Universitetit të Prishtinës, Universitetit “Ukshin Hoti” Prizren, Universitetit “Haxhi Zeka” Pejë, Universitetit “Isa Boletini” Mitrovicë, Universitetit “Fehmi Agani” Gjakovë, Universitetit të Shkencave të Aplikuara në Ferizaj, si dhe nga rektorja e Kolegjit Publik IBCM në Mitrovicë, në kuadër të Konferencës së fundit të Rektorëve të Institucioneve Publike të Arsimit të Lartë, parasheh bashkëpunim të gjerë mes universiteteve publike, duke përfshirë shkëmbimin e stafit akademik dhe studentëve, organizimin e konferencave, zhvillimin e programeve të përbashkëta studimore, krijimin e qendrave të ekselencës, si dhe aplikime të përbashkëta për fonde kombëtare dhe ndërkombëtare.
Ky bashkëpunim është frymëzuar nga parimet e digjitalizimit dhe përdorimit të inteligjencës artificiale, me qëllim që universitetet kosovare të harmonizohen me praktikat më të avancuara të arsimit evropian dhe botëror.
Përmes kësaj marrëveshjeje, universitetet publike të Kosovës për herë të parë kanë vendosur të flasin me një zë të përbashkët, duke krijuar një aleancë kombëtare që synon të forcojë cilësinë e mësimdhënies, kërkimit shkencor dhe inovacionit.
Në vizionin e saj, Konferenca e Rektorëve të Institucioneve Publike të Arsimit të Lartë në Kosovë ka qëllim që në të ardhmen e afërt një marrëveshje e tillë të zgjerohet edhe me universitetet motra anë e kënd botës universitare shqiptare.
Ky orientim synon që bashkëpunimi ndërmjet institucioneve publike të Kosovës të marrë përmasa rajonale dhe ndërkombëtare, duke krijuar ura të reja lidhjeje me universitete shqiptare në Shqipëri, Maqedoninë e Veriut, Mal të Zi e diasporë, në mënyrë që të ndërtohet një hapësirë e përbashkët akademike kombëtare.
Po ashtu, në këtë konferencë u bë edhe rotacioni i udhëheqjes së Konferencës së Rektorëve. Rektori i Universitetit të Prishtinës, Arben Hajrullahu, ia dorëzoi detyrën kryesuesit të ri, Mentor Alishanit nga Universiteti “Ukshin Hoti” i Prizrenit, ndërsa zëvendës kryesues u zgjodh Armand Krasniqi nga Universiteti “Haxhi Zeka” i Pejës.
