Përparim Avdili edhe zyrtarisht kandidat për kryebashkiak të Cyrihut
FDP e Cyrihut ka shpallur kandidatët e saj për zgjedhjet e ardhshme të këshillit bashkiak dhe për postin e kryetarit të qytetit. Në mbledhjen e së enjtes në mbrëmje, partia ka nominuar tre kandidatë: Përparim Avdili për kryetar bashkie, si dhe Marita Verbali dhe anëtarin aktual të ekzekutivit, Michael Baumer, për qeverinë e qytetit.
Avdili, i cili prej disa vitesh është kryetar i FDP-së për Cyrih dhe asamblist i qytetit, do të garojë jo vetëm për postin e kryebashkiakut, por edhe si anëtar i ekzekutivit. Pas publikimit të kandidaturës, ai e ka cilësuar nominimin si një nder dhe sfidë të madhe.
“Jam i emocionuar ta pranoj këtë sfidë dhe mezi pres fushatën e ardhshme zgjedhore. Së bashku mund t’i ndryshojmë gjërat”, ka shkruar ai në një postim në rrjetet sociale.
Në mesazhin e tij, Avdili theksoi se Cyrihu ka qenë gjithmonë një qytet i mundësive, por se në vitet e fundit shumë prej këtyre aspekteve janë zbehur. Ai listoi disa nga sfidat kryesore të qytetit:
Mungesa e tokës ndërtimore dhe procedurat e gjata për leje ndërtimi, që sipas tij po rrisin qiratë dhe po largojnë familjet nga Cyrihu.
Rritja e administratës dhe ngarkesa me rregullore e taksa, që po e bëjnë më të vështirë zhvillimin e bizneseve, nga startup-et deri te kompanitë e mesme.
Humbja e atraktivitetit kulturor, pasi qyteti mbështet prej vitesh të njëjtat institucione, ndërkohë që ngjarje të mëdha ndërkombëtare po orientohen drejt qyteteve të tjera si Bazeli.
“Cyrihu im ka qenë gjithmonë një vend ku ëndrrat mund të bëheshin realitet. Me energji, vrull dhe ide të freskëta, dua ta rikthej sërish aty ku e meriton: një qytet mundësish, diversiteti dhe ndryshimi”, shkroi Avdili.
