OEK thirrje urgjente ZRRE`së: Zbato vendimin e Gjykatës Komerciale, dëmi 10 milionë në muaj
Oda Ekonomike e Kosovës sërish i ka bërë thirrje ZRRE që të zbatojë vendimin e Gjykatës Komerciale ku ishte hedhur poshtë kërkesa që bizneset të dalin në tregun e lirë.
Sipas OEK, bazuar në të dhënat preliminare, konsumi vjetor i bizneseve të përfshira në tregun e lirë vlerësohet të jetë rreth 550 Gwh.
Me çmimet aktuale të ofruara në tregun e lirë, kjo përkthehet në një kosto minimale prej rreth 120 milionë euro në vit.
Tutje thuhet se nga kjo rezulton një dëm mesatar prej rreth 328 mijë euro në ditë, respektivisht rreth 10 milionë euro në muaj, si pasojë e moszbatimit të aktgjykimit të Gjykatës Komerciale nga ZRrE.
Thirrja e plotë:
Efekti i tregut të lirë dhe moszbatimi i aktgjykimit të Gjykatës Komerciale – dëmi real për bizneset prodhuese. Oda Ekonomike e Kosovës, së bashku me Shoqatën e saj të Prodhuesve të Kosovës, rithekson se dalja e detyruar e bizneseve në tregun e lirë të energjisë po krijon pasoja të rënda financiare për sektorin prodhues dhe ekonominë në tërësi.
Bazuar në të dhënat preliminare, konsumi vjetor i bizneseve të përfshira në tregun e lirë vlerësohet të jetë rreth 550 Gëh. Me çmimet aktuale të ofruara në tregun e lirë, kjo përkthehet në një kosto minimale prej rreth 120 milionë euro në vit.
Nga kjo rezulton një dëm mesatar prej rreth 328 mijë euro në ditë, respektivisht rreth 10 milionë euro në muaj, si pasojë e moszbatimit të aktgjykimit të Gjykatës Komerciale nga ZRrE.
Një tjetër barrë e rëndë financiare për bizneset është kërkesa e operatorëve të furnizimit për të paguar paraprakisht dy muaj depozitë në momentin e nënshkrimit të kontratave, që përllogaritet të arrijë në rreth 20 milionë euro para të gatshme. Shumë biznese, për shkak të mungesës së likuiditetit, janë detyruar të financohen nga bankat, duke paguar edhe interesa shtesë.
Duke marrë parasysh edhe faturat e KEK-ut të cilat kanë afate pagese shumë të shkurtra, vlerësohet se vetëm gjatë muajit gusht 2025 bizneset do të jenë të detyruara të paguajnë rreth 50 milionë euro para të gatshme, përfshirë edhe shumën e depozitave.
Kjo situatë po e tkurr ndjeshëm likuiditetin në treg, po rrit kostot financiare të bizneseve dhe po dëmton seriozisht qëndrueshmërinë dhe konkurrueshmërinë e sektorit prodhues në Kosovë.
Të gjitha vlerat e përmendura më sipër janë të përllogaritura bazuar në konsumin vjetor dhe çmimet e ofruara aktualisht në tregun e lirë të energjisë.
Kërkojmë sërish pezullim të vendimit të ZRrE-së për daljen në treg të lirë, për të ruajtur ekonominë e vendit, mbrojtjen e biznesit dhe asetin më të vlefshëm – qytetarin e Republikës së Kosovës.
Sot pezullimi i vendimit të ZRrE-së është akt patriotik.
