Tejkalim i shpejtësisë, kundërvajtësit i shqiptohet gjobë dhe njoftohen autoritetet zvicerane
Gjilan, 28 korrik 2025 – Më datë 25.07.2025, zyrtarët policorë të Njësisë për Komunikacion Rrugor nga Drejtoria Rajonale e Policisë në Gjilan, gjatë realizimit të detyrave të rregullta për kontrollin e trafikut rrugor, në pikën e kontrollit të automjeteve në rrugën nacionale Gjilan – Kamenicë, kanë ndaluar një automjet me targa ZH (zvicerane), i cili në zonën ku kufizimi i shpejtësisë është i përcaktuar me shenjë trafiku prej gjashtëdhjetë (60) km/h, po voziste me shpejtësi njëqind e trembëdhjetë (113) km/h.
Ndaj drejtuesit të automjetit, i cili posedon patentë shoferi të lëshuar nga autoritetet zvicerane, është shqiptuar gjobë për kundërvajtje në vlerë prej treqind (300) euro dhe masë mbrojtëse e ndalimit të drejtimit të mjeteve motorike në territorin e Republikës së Kosovës për një periudhë prej tre (3) muajsh.
Duke u bazuar në marrëveshjen ndërmjet Republikës së Kosovës dhe shtetit zviceran për bashkëpunim në trajtimin e kundërvajtjeve të kryera nga shtetasit përkatës në territorin e shtetit tjetër, gjoba e shqiptuar do të përcillet për njoftim tek autoritetet kompetente në Zvicër, sipas marrëveshjes.
