Panairi i prodhimeve vendore promovoi bizneset lokale në Kamenicë
Panairi i prodhimeve vendore mbrëmë mblidhi në sheshin e qytetit biznese lokaje të cilët patën mundësinë të prezantojnë produktet e tyre. Në këtë aktivitet qytetarët kishin mundësi që të informoheshin për produktet e bëra në Kamenicë dhe regjion.
Në panair – i cili u organizua në kuadër të Kamenica Summer Fest – bizneset që morën pjesë kanë ekspozuar produkte të ndryshme nga ushqimet tradicionale deri tek artizanatet dhe produkte tjera që pasqyrojnë kreativitetin dhe pasurinë e Kamenicës.
Drejtoresha e Zhvillimit Ekonomik, Burbuqe Leka, theksoi rëndësinë e këtij panairi për zhvillimin ekonomik dhe mbështetjen e bizneseve lokale.
“Ky panair është një mundësi e shkëlqyer për të promovuar produktet që krijohen nga pasioni dhe puna e palodhur e bizneseve tona. Ne si komunë po bëjmë të pamundurën për të mbështetur zhvillimin e bizneseve lokale, dhe ky aktivitet është një shembull i shkëlqyer se si mund të bashkëpunojmë dhe të rrisim kapacitetet tona. Panairet e tilla janë mundësi për të afruar konsumatorët me produktet që janë të prodhuara pranë tyre” u shpreh Drejtoresha.
Ky panair ka ofruar një mundësi të shkëlqyer për vizitorët që të njohin më mirë produktet lokale dhe të kontribuojnë në rritjen e qëndrueshme të ekonomisë së qytetit.
