Drita pëson (2:0) nga dy penallti për Kopenhagen
Copenhagen ka triumfuar me rezultat 2-0 ndaj Dritës në ndeshjen e parë të rrethit të dytë kualifikues në Ligën e Kampionëve, duke siguruar një epërsi të rëndësishme para përballjes së kthimit në Prishtinë.
Kampioni i Kosovës e nisi takimin me besim dhe disiplinë taktike, duke u përballur denjësisht me një kundërshtar të kalibrit më të lartë. Edhe pse Copenhagen dominoi në zotërim dhe krijoi më shumë raste, mbrojtja e Dritës rezistoi për më shumë se një orë.
Rasti më i mirë i pjesës së parë erdhi në minutën e 33-të, kur Mohamed Elyounoussi goditi të dy shtyllat në një aksion dramatik, por Faton Maloku reagoi në kohë dhe e kapi topin në vijën fatale. Në këtë pjesë loje, gjyqtari Martin Matosa ndëshkoi me karton të verdhë vetëm dy lojtarë të Dritës: Albert Dabiqaj dhe Vesel Limaj.
Pjesa e dytë u hap me më shumë intensitet dhe ritëm nga të dyja palët. Drita krijoi një mundësi të mirë në minutën e 51-të me Besnik Krasniqin, por goditja e tij u ndal nga portieri danez.
Epërsia e vendasve erdhi në minutën e 67-të kur Raddy Ovouka ndali Elyounoussin në zonë dhe arbitri akordoi penallti. Magnus Mattsson u tregua i saktë nga pika e bardhë dhe shënoi për 1-0.
Pesë minuta më vonë, situata u përsërit: Ovouka shkaktoi edhe një tjetër penallti, këtë herë pas konsultimit me VAR. Edhe kësaj radhe, Mattsson u tregua i saktë duke e dyfishuar epërsinë në 2-0.
Në minutën e 78-të, Faton Maloku realizoi një pritje të shkëlqyer ndaj një goditjeje të fortë të Elias Achouri, duke e mbajtur Dritën në lojë për një rezultat më të ngushtë.
Pavarësisht humbjes, Drita ruan shpresat për ndeshjen e kthimit që do të zhvillohet në Prishtinë pas një jave. Skuadra gjilanase ka treguar se mund të reagojë, dhe do të kërkojë të përmbysë rezultatin përpara tifozëve të saj.
