Pas 21 vitesh punë pensionohet Zyrtari Kryesor Financiar, Naser Hashani
Në një ceremoni përshëndetëse mes kolegëve e familjarëve pas 21 vitesh punë në Drejtorinë për Buxhet dhe Financa, sot është pensionuar Zyrtari Kryesor Financiar Naser Hashani.
Drektoresha e Buxhetit dhe Financave, Ardita Dërmaku, në fjalën e saj falënderoi zyrtarin Hashani duke përmendur kontributin dhe punën e tij të palodhshme në këtë drejtori.
“Pensionimi është një nga momentet më të veçanta në jetën e një personi, ku prej këtu fillon një rrugëtim i ri. Zyrtari Naser Hashani po e fillon këtë rrugëtim të ri pranë familjes, dhe ne i jemi shumë mirënjohës për punën dhe kontributin që ka dhënë gjatë këtyre viteve në institucion. Ka qenë bashkëpunues me secilin që i ka kërkuar ndihmë dhe u është përgjigjur me shumë pozitivitet. Andaj si në emër të Drejtorisë për Buxhet dhe Financa i uroj shëndet e jetë të gjate me familje”, ka thënë Drejtoresha Dërmaku.
Kryetari Kadri Rahimaj në fjalën e tij përshëndetëse tha se zyrtari Hashani është shembull që secili nga ne dëshiron ta përvetësoj për vete.
“Ne punën dhe angazhimin me Naserin e kemi ndarë tash 4 vite por, nganjëherë nuk duhet shumë angazhim që të kuptosh tjetrin se si është si karakter, si koleg dhe si bashkëpunëtor. Naseri për një periudhë kaq të gjatë me punën e ti ka arritur të sfidojë edhe auditorët si të jashtëm e të brendshëm, dhe ka qenë zyrtari i dytë kryesor pas kryetarit, Pra ka pasur një punë tejet të rëndësishme që me angazhimin e tij të palodhshëm ka treguar shembullin më të mirë të një punëtori”, ka thënë Kryetari Rahimaj duke shtuar se në shumë raste ka qenë edhe këshilldhënës.
“Punëtorët si Naseri i duhen një institucioni pasi që edhe në rastet kur ne mendonim se nuk kishte zgjidhje për ndonjë sfidë ai vinte me këshilla se si t’i trajtojmë problemet. Shpeshherë Naseri punonte më gjatë sesa orari që kishte duke lënë anash edhe familjen por tani që i uroj shëndet e t’i kompensoj ato kohë pranë familje”, ka thënë Kryetari Rahimaj.
E në këtë ceremoni edhe zyrtari Selami Zylfiu në shenjë falenderimi për kontributin e dhënë të zyrtarit Hashani, i kishte përgatitur një letër përshëndetëse me fjale tejet të çmuara.
“Gjatë këtyre viteve ke dhënë kotnribut të jashtëzakonshëm për institucionin. Angazhimi yt i vazhdueshem ka ndihmuar në ndërtimin, transformimin e një drejtorie me standarde të larta. Ke qenë punëtorë i shkëlqyeshëm, shok e njeri shumë i dashur. Tani që po e mbyll këtë kapitull të rëndësishëm uroj që këto ditë t’i kalosh me shëndet e pranë familjes”, ishin disa nga fjalët e shkruara në këtë letër.
Pas këtyre fjalimeve edhe zyrtar Naser Hashani i emocionuar falënderoi të gjithë për bashkëpunimin.
“Faleminderit shumë Kryetarit, Drejtoreshës, kolegëve të drejtorisë dhe të gjithë juve që keni bashkëpunuar me mua. Jam i nderuar nga të gjitha këto fjalë të mira që i thatë. Jam munduar që për periudhën 21 vjeçare sa kam qenë këtu të jap maksimumin nga vetja. Kemi pasur sfida e problem të ndryshme por me punë e angazhim i kemi kaluar. Unë kur jam punësuar dhe kam amrr aktemërimin kam qenë i ri, ndërsa dje kur mora vendimin për pensionim, e kuptova që me të vërtetë vitet kishin ikur shumë shpejt. Uroj që edhe ju të prisni këtë ditë”, është shprehur ai me shumë emocion.
Në shenjë falenderimi për punën e tij Drejtoresha Ardita Dërmaku i dhuroi një mirënjohje.
