UKZ organizoi me sukses garën Hackathon 2025
Fakulteti i Shkencave Kompjuterike në Universitetin Publik “Kadri Zeka” (UKZ) organizoi me sukses edicionin e sivjetshëm të garës universitare Hackathon 2025 — një ngjarje dyditore që bashkoi studentët dhe maturantët më të talentuar në fushën e teknologjisë dhe inovacionit.
Kjo garë shërbeu si një mundësi e jashtëzakonshme për pjesëmarrësit që të demonstrojnë aftësitë e tyre në programim, dizajn, zhvillim të ideve kreative dhe zgjidhje të problemeve reale. Në një atmosferë dinamike dhe konkurruese, ekipet u përballën me sfida teknologjike që kërkonin kreativitet, bashkëpunim dhe përkushtim të lartë.
Dita e parë: Maturantët në qendër të vëmendjes
Hackathon 2025 filloi me garën e dedikuar për maturantët, të cilët prezantuan projektet e tyre inovative përpara komisionit akademik të Fakultetit të Shkencave Kompjuterike. Pas një paraqitjeje mbresëlënëse të ideve, fituesit u shpallën në një ceremoni të veçantë të ndarjes së çmimeve.
Vendin e parë e fitoi ekipi i përbërë nga Korab Arifi, Erion Ramizi dhe Erion Mehmeti, me projektin e tyre kreativ, i vlerësuar lartë nga komisioni përbërë nga:
- Prof. Ass. Dr. Afërdita Ibrahimi (Dekane e FSHK-së),
- Prof. Asoc. Dr. Basri Ahmedi,
- Ass. Buen Bajrami,
- Ass. Donat Dalipi.
Ndërsa vendin e dytë e zuri ekipi i maturantëve: Driola Korbi, Rela Zeqiri, Liana Ahmeti dhe Lina Latifi
Dita e dytë: Sfidat për studentët
Në ditën e dytë, Hackathon-i vazhdoi me dy sfida të dedikuara për studentët.
Sfidën e parë e përbënte gara kryesore teknologjike, ku studentët prezantuan projektet e tyre mbi temat e përzgjedhura nga komisioni akademik. Projektet u vlerësuan sipas inovacionit, zbatimit teknik dhe ndikimit potencial. Fituesit ishin:
- Vendi i parë: Blendi Limoni, Elta Berisha dhe Agoneta Ahmeti
- Vendi i dytë: Rigesa Jashari, Kaltrina Pjaziti dhe Rinesa Osmani
- Vendi i tretë: Gazmend Halili, Donesa Shala, Dimal Hjarizi dhe Rona Beqiri
Sfidën e dytë e përbënte zhvillimi i ideve për start-up biznese. Studentët punuan në grupe për të kthyer konceptet e tyre në prototipe funksionale. Projektet u prezantuan përballë një jurie të përbërë nga përfaqësues të bizneseve, të cilët vlerësuan idetë më premtuese.
Ideja më e mirë u shpërblye dhe u prezantua nga ekipi: Leurent Ismajli, Rion Osmanaj dhe Rigon Osmanaj.
Rektori i Universitetit “Kadri Zeka”, Prof. Asoc. Dr. Artan Dërmaku, në fjalën e tij theksoi se ngjarje si Hackathon 2025 janë dëshmi e përkushtimit të UKZ-së për të nxitur mendimin kritik, inovacionin dhe frymën e sipërmarrjes te të rinjtë.
Ndërsa Dekanja e Fakultetit të Shkencave Kompjuterike, Prof. Ass. Dr. Afërdita Ibrahimi, bashkë me stafin akademik, shprehën mbështetjen e fuqishme për studentët dhe maturantët, duke nënvizuar rëndësinë e aktiviteteve të tilla në ndërtimin e një ekosistemi inovativ dhe të qëndrueshëm në Kosovë.
Në përmbyllje të garës, Rektori Prof. Asoc. Dr. Artan Dërmaku ndau mirënjohje për përfaqësuesit e bizneseve për kontributin e tyre, ndërsa studentëve pjesëmarrës iu shpërndanë certifikata vlerësimi.
